Wilson's Tales of the Borders and of Scotland, Volume 20

LONDON: WALTER SCOTT, 14 PATERNOSTER SQUARE, AND NEWCASTLE-UPON-TYNE. 1884.

It is now about twenty years sin' I first raised my voice in the desk o' the kirk o' St Fillan's, in the parish o' that name, and He wha out o' the mouths o' babes and sucklins did ordain praise, hath never thought meet, by means o' ony catarrh, cynanche, quinsy, toothache, or lock-jaw, to close up my mouth, and prevent me frae leadin the congregation in a clear, melodious strain, to the worship o' the Chief Musician. When I was ordained session clerk, schoolmaster, and precentor, I had already passed about thirty years o' my pilgrimage; yet filled wi' Latin and Greek, till my pia mater was absolutely like to burst, I had, notwithstanding, nae trade by the hand. The reason was this. My father, who had been for forty years sexton o' the parish, had seen, wi' an e'e lang practised in searchin for traces o' death in the faces o' parishioners—for the labourer maun live by his hire, and the merchant by his customers, and thou shalt eat the labour of thine hands —a pleasant leucophlegmatic tinge about the gills o' Jedediah Cameron, my predecessor in the three offices already mentioned. Weel, as the husbandman in dry weather, when his fields are parched, and his braird thin and weak, watches the clouds that contain rain—mair precious to him than the ointment that ran down upon the beard, even Aaron's dry beard—my guid father watched the dropsical signs or indications in Jedediah's face, daily and hourly, in the fair and legitimate hope o' gettin the aridity o' my starvin condition quenched and satisfied. He was an argute sexton, and had learned, in his younger days, some smatterin o' Latin, though I never could ascertain that he retained more of the humane lear, than the twa proverbs, Vita mortalium brevis , Life is short, which comes originally frae Homer; and Pecuniæ obediunt omnia , which comes frae the sixth chapter o' Ecclesiastes— Money answereth all things.
But my father was never contented wi' his ain prognosis . His ain ee for death was as gleg as that o' the hawk for its quarry; but the glegness wasna a mere junction or combination o' a keen and praiseworthy desire to live, and a lang experience o' lookin for death in ithers; he had science to guide him; he knew a' the Latin names comprehended in Dr Cullen's Nosology; an' Buchan's Domestic Medicine was scarcely ever out o' his hands, except when there was a spade in them. I hae the auld, thumed, and faulded, and marked copy o' our domestic Æsculapius yet; and, as I look at the store from which he used to draw the lore that enabled him to see, as if by a kind o' necromantic divination, a guid lucrative death, though still lodged in the wame o' futurity, I canna but drap a tear to the memory o' ane wha toiled sae hard for the sake o' his son. But I examine the book, sometimes, in a mair philosophic way—to mark the train o' my auld parent's mind, as he had perused his text-book; for it was his practice, when he saw ony o' the parishioners exhibiting favourable symptoms—such as a hard, dry cough, puffed legs, white liver lips, or even some o' the mair dubious indications, such as a pale cheek, spare body, drooping head, difficulty in walking, morbid appetite, or bulimia, the delirium tremens o' dram-drinkers, the yellow o' the white o' the ee o' hypochondriacs, and the like—to search in Buchan for the diseases portended by thae appearances, and, when he was sure he had caught them, to draw a pencil stroke along the margin opposite to the pleasantest parts o' the doctor's descriptions. I never saw mony marks opposite the common and innocuous complaints— cholica , or pain in the stamach; catarrhs , or cauld; arthritis , or gout; rheumatismus , or rheumatism; odontalgia , or toothache; and sae forth: thae were beneath his notice. Neither did I ever observe ony marks o' attention to what are called prophylactics, or remedies, to prevent diseases comin on: thae nostrums he plainly despised. But, sae far as I could discover, he had a very marked abhorrence o' what the doctors ca' therapeutics, or means and processes o' curin diseases, and keepin awa death; and as for what are denominated specifics , or infallible remedies, he wouldna hear o' them ava—showin his despite o' them by the exclamation— Psha! scribbled with contemptuous haste on the margin. The soul and marrow o' the book to the guid man—bless him!—were the mortal symptoms—the facies Hippocraticus , the Hippocratic face; the raucitus mortis , or rattle in the throat; subsultus tendinum , or twitching o' the hands and fingers; the glazing o' the ee, and the stoppin o' the breath, and the like o' thae serious signs and appearances. A strong, determined stroke o' the pencil marked his attention to and interest in the Doctor's touchin account o' thae turns o' the spindle wharby the thread o' our existence is wound up for ever. It may be easily and safely supposed, that the melancholy words, descriptive o' the oncome o' the grim tyrant himsel— and death closes the tragic scene —sae touchingly and feelingly introduced by the eloquent author werena lost on my respectit parent.