Discours prodigieux et espouventable de trois Espaignols et une Espagnolle, / Magiciens et sorciers qui se faisoient porter par les diables, de ville en ville, avec leurs déclarations d'avoir fait mourir plusieurs personnes et bestail par leurs sorcillèges, et aussi d'avoir fait plusieurs dégats aux biens de la terre : Ensemble l'arrest prononcé contre eux par la Cour de Parlement de Bourdeaux, le Samedy 10. jour de Mars, 1610

Produced by Carlo Traverso, Renald Levesque and the Online Distributed
Proofreading Team. This file was produced from images generously made available by the Bibliothèque nationale de France (BnF/Gallica)
DICOURS PRODIGIEUX ET espouventable, de trois Espaignols & une Espagnolle, Magiciens & Sorciers, qui se faisoient porter par les diables, de ville en ville, avec leurs declarations d'avoir fait mourir plusieurs personnes & bestail par leurs sorcilleges, & aussi d'avoir fait plusieurs degats aux biens de la terre.
Ensemble l'Arrest prononcé contre eux par la Cour de Parlement de Bourdeaux, le Samedy 10e jour de Mars, 1610.
Jouxte la coppie imprimee à Bourdeaux.
DICOURS PRODIGIEUX ET ESPOUVENTABLE, de trois Espaignols & une Espagnolle, Magiciens & sorciers, qui se faisoient porter par les diables, de ville en ville: avec leurs declarations d'avoir fait mourir plusieurs personnes & bestail par leurs sorcilleges, & aussi d'avoir fait plusieurs degats aux biens de la terre.
Ensemble l'arrest prononcé contre eux par la Cour de Parlement de Bourdeaux, le Samedy dixiesme Mars, 1610.
L'homme des aussi tost qu'il fut fabriquer par l'Eternel ouvrier divin, fut des aussi tost fut pris par l'ennemy de nature humaine, du depuis Satan n'a cessé par toutes subtilitez, & moyen de pouvoir sucomber & attirer le genre humain en ces lacs. Des incontinant que ce grand Capitaine Moyse eut en main la Comission pour retirer les Israëlites d'entre les mains de ce pervers & inique Roy d'Egypte Pharaon, il luy declare l'ambassade celeste, il le somme à relacher le peuple de Dieu: Et pour preuver son dir, il jette sa verge en bas, qui tout aussi tost prend vie, & se metamorphose en Serpent furieux. Les Magiciens veulent fair de mesme: mais pour neant: Car celle qui est produite par la toute puissance divine, engloutit & dissipe ceux qui sont provenus de l'art Diabolique.
De mesme fut fait des raynes, sauterelles, & autres animaux provenus d'enchanterie & sortilleges: tellement que l'home est bien aveuglé, & dehors de toutes considerations, qui s'adonne à ces malheureuse & detestables oeuvres de Magie, quittant son Dieu pour suyvre le diable, laissant la verité pour le mensonge, se precipiter du port de grace & salut, dans les abismes & gouffre des Enfers. Les lecteurs se contenteront de ce preambule, à celle fin de ne les ennuyer pour estre prolixe, se contentant s'il leur plaist au recit de ce discours tres-veritable prodigieux, & autant admirable que long temps aye esté mis en lumiere.