Le roman de la rose - Tome IV

LE ROMAN DE LA ROSE
Comment Nature la subtille Forge toujours ou filz ou tille, Affin que l'humaine lignye Par son deffaut ne faille mye. ( Page 2, vers 16553.)

LE ROMAN DE LA ROSE





Tous jors est-il ung seul Fenis,16643 Et vit ainçois qu'il soit fenis Par cinq cens ans; au darrenier Si fait ung feu grant et plenier D'espices, et s'i boute et s'art, Ainsinc fait de son cors essart. Mès por ce que sa forme garde, De sa poudre, combien qu'il s'arde, Ung autre Fenis en revient, Où cil méismes, se Dé vient, Que Nature ainsinc resuscite, Qui tant à l'espece profite: Qu'ele perdroit du tout son estre, S'el ne faisoit cestui renestre, Si que se Mort Fenis devore, Fenis toutevois vis demore. S'el en avoit mil devorés, Si seroit Fenis demorés. C'est Fenis la commune forme, Que Nature ès pieces reforme, Qui du tout perduë seroit, Qui l'autre vivre ne lerroit. Ceste maniere néis ont Trestoutes les choses qui sont Desouz le cercle de la lune, Que s'il en puet demorer une, S'espece tant en li vivra, Que jà Mort ne la consivra. Mès Nature douce et piteuse, Quant el voit que Mort l'envieuse Entre li et corrupcion Vuelent metre à destruccion Quanqu'el trueve dedens sa forge, Tous jors martele, tous jors forge,