Histoire du Canada / et voyages que les Freres mineurs recollects y ont faicts pour la conversion des infidelles.

HISTOIRE
DU CANADA
VOYAGES QUE LES FRERES
Mineurs Recollects y ont faicts pour la conversion des Infidelles.
DIVISEZ EN QUATRE LIVRES.
Où est amplement traicté des choses principales arrivées dans le pays depuis l'an 1615 jusques à la prise qui en a esté faicte par les Anglois. Des biens & commoditez qu'on en peut esperer. Des moeurs, ceremonies, creance, loix, & coustumes merveilleuses de ses habitans. De la conversion & baptesme de plusieurs, & des moyens necessaires pour les amener à la cognoissance de Dieu. L'entretien ordinaire de nos Mariniers, & autres particularités qui se remarquent en la suite de l'histoire.
Fait & composé par le F. GABRIEL SAGARD, THEODAT, Mineur Recollect de la Province de Paris.
A PARIS,
Chez Claude Sonnius, rue S. Jacques, à l'Escu de Basle, & au Compas d'or, M. DC XXXVI. Avec Privilege & Approbation.
A TRÈS-AUGUSTE ET SERENISSIME PRINCE
Henry de Lorraine, ARCHEVESQUE ET DUC de Rheims, premier Pair de France, nay Legat du S. Siege, & Abbé des deux Monasteres S. Denis, & S. Remy, &c.
ONSEIGNEUR, Il n'y a rien qui charme tant, les affections des hommes, & qui les attache plus puissamment aux grands Princes que la vertu & bon exemple qu'ils doivent à leurs sujets. Vostre naissance de la tres-ancienne, tres Auguste & royalle maison de Lorraine, vous est d'un si grand advantage que je ne m'estonne point de l'opinion de plusieurs que vostre grandeur sera un jour un sainct. La perfection peut estre petite au commencement, mais elle s'esleve comme les Cedres du Liban, & va tousjours croissant à mesure qu'elle est arrousée des benedictions du Ciel, que le Seigneur verse abondamment en vous dont on en voit tous les jours des effects. L'histoire nous apprend (Monseigneur) qu'autrefois il n'estoit pas permis à aucun d'aller saluer les Roys de Perse, que l'on n'eust quelque chose à leur donner, non pour les enrichir: car ils estoient des plus grands & puissans Princes de toute la terre, mais seulement pour obliger les sujets à rendre quelque tesmoignage de l'affection qu'ils portoient à leur Prince.