Maler-Schnadahüpfel
1. Z'erst tuat ma's patiern,
Drauf kimmt dö Lasur
Und durch dös Lasiern
Werd's grad wia d' Natur!
… Hu-i-di-e, Hu-i-di-e!
2. Z'letzt nimmst no a Farb her,
Die d' Aug'n recht daschreckt,
Die streichst nocha dick hi …
Dös hoaßt ma 'n Effekt!
… Hu-i-di-e, Hu-i-di-e!
3. Nur Farb drauf in Häuf'n
Als wann g'mauert wer'n müaßt,
Daß d' Nachwelt kann greif'n,
Wann d' Farb eppa schiaßt!
… Hu-i-di-e, Hi-i-di-e!
4. A Leinwand hon i aufg'spannt
So glatt und so fein –
Ja, komponieren kunnt i schon, woaßt,
Aber 's fallt ma nix ein!
… Hu-i-di-e, Hu-i-di-e!
5. Jetz glaub i in koan Fall,
Daß i net weit mehr fehl –
Morg'n steht mir dö dick' Köchin
Als Psyche Modell! …
… Hu-i-di-e, Hu-i-di-e!
6. Na, jetz bin i im Zweifel:
Schaugt d' Psyche so aus?
Z'letzt, hol mi der Teufel,
I mach a Sennerin draus!
… Hu-i-di-e, Hu-i-di-e, Hu-i-di-e!
7. Ja, es is ja wahr a,
In Kritisieren, do sans fix –
Aber selba was macha?
Na – macha könnas nix!
… Hu-i-di-e, Hu-i-di-e!
8. Beim Mal'n wia beim Dicht'n
Isch allweil oan G'schicht:
Es soll si halt raime …
So is a Gedicht!
Hu-i-di-e, Hu-i-di-e!
★