Fig. Quinquages. tertia B.
Modus triplex delineandi columnas spirales.
Columnæ figuræ superioris carent ea concinnitate, qua præditæ sunt columnæ spirales æneæ celeberrimi Equitis Bernini ad sepulcrum S. Petri in Vaticano. Itaque methodum triplicem exhibeo ad minuenda spatia totius altitudinis columnæ.
1. Recta OA sit æqualis altitudini AB columnæ. Fiat autem recta OB, & arcus AP ex centro O, divisus in partes duodecim æquales, ducendo rectas, quæ per puncta divisionum desinant in columnam rectam; ac demum fiant parallelæ ad basim: Spatia inter has parallelas dabunt aperturam circini pro triangulis æquilateris & pro spiris, ut ostendit columna 1.
2. Translatâ in C tertiâ parte altitudinis columnæ ab ejus imo scapo, habeat circinus aperturam CD; ac posito uno ejus crure prius in D, postea in C, fiant duo parvi arcus ad E: sectio illorum arcuum erit centrum arcûs DC, quem oportet dividere in duodecim partes æquales, & ex punctis divisionum ducere parallelas ad basim. Tum spatiis inter parallelas divisis in quatuor partes æquales, tres ex illis partibus dabunt longitudinem crurum pro triangulis isoscelibus; vertices autem triangulorum erunt centra singularum spirarum, ut ostendit columna 2.
3. Ductâ ex medio summitatis G rectâ GF, spatium HF transferatur in I, & fiat recta IL parallela ad basim HF; spatium IL transferatur in N, ac fiat NM, & sic deinceps. In parvis columnis triangula sine sensibili errore duci possunt per diagonales: in columnis tamen grandioribus, alterutrum ex modis antea explicatis adhibere necesse est.