FIGURA SEXTA.
Modus delineandi opticè sine lineis occultis.
Desiderans facili methodo figuram hanc exponere, dabo rationem elevandi corpora sine lineis occultis, ut in superiori tetigi; ostendam igitur hic, quomodo quinque cubi adumbrati desumantur ab eorum vestigiis, & elevationibus.
Duas debes facere præparationes, si libeat, in chartis etiam separatis. Prima erit formare geometricè vestigium, & elevationem, ut vides in B & A. Secunda erit distribuere super lineam plani latitudinem vestigii B, puta in NM, & in duabus proximis: Illius longitudo MX ducta ad distantiam D, secat visualem MO in R. Spatium autem obliquatum E utile etiam est aliis duobus quadratis positis super eamdem lineam plani; anguli quorum translati ad distantiam B, totidem angulos dabunt inter visuales NO, MO. Hoc posito, duces perpendicularem ad angulum N, quæ in elevationibus geometricis semper necessaria est, eaque tertia linea est, quam supra dixi. Transfer postea altitudinem A in NF, cum visualibus FO, NO, & invenies altitudinem ST. Hoc pariter de cæteris eveniet.
Sciendum superest quonam modo supradicta præparatione uti possis ad construendos stylobatas adumbratos, & inornatos.
Super aliam igitur chartam dispone situm cum duabus lineis, plani scilicet, & horizontis, una cum puncto oculi O, & perpendiculari V, ejusdem mensuræ cum supradicta præparatione, & faciens uti me fecisse vides. Experire postea circino NF æqualia esse 1, 5, & 2, 6. Metire pariter ST, & invenies æqualia 7 & 3; facies postea lineas planas, & visuales ad punctum oculi, & habebis planum superius cubi in 1, 2, 3, 4. Hoc idem faciendum est de aliis. Uno verbo: anguli vestigiorum dabunt tibi lineas perpendiculares, & anguli elevationis dabunt lineas planas; atque hoc semper erit.