FIGURA TERTIA.
Optica delineatio rectanguli, alterâ parte longioris.
Latitudo BC rectanguli A ponatur in linea plani, adhibito circino, vel chartulâ complicatâ; & ex punctis B & C fiant visuales ad O, punctum perspectivæ. Tum papyro ex altera parte iterum complicatâ, notetur longitudo CD rectanguli; ducendo tum rectam DE ad punctum distantiæ, tum rectam FG parallelam ad BC, quæ complebit opticam delineationem rectanguli.
Altera figura ostendit complicationem cruciformem papyri, quæ adhiberi potest in delineandis rectangulis, seu latitudo eorum sit major longitudine, aut vice versâ; seu latitudo & longitudo sint æquales.