MONITA ad TYRONES.
Concinnitatem ac symmetriam opticæ delineationes ædificiorum habere nequeunt, nisi utramque mutuentur ab Architectura. Proinde necesse est, ut in istius graphide ac intelligentia te aliquandiu exerceas, donec uniuscujusque elevationis vestigium formare didiceris, ex eoque eruere sectionem totius longitudinis, ut in Opere toto videre est, præsertim figuris sexagesimaoctava & septuagesima. Siquidem ex vestigio & ex sectione derivatur in opticas imagines congrua rerum singularum profunditas.
Subjiciam his consilium summi momenti; videlicet, egregiè intelligas oportet figuram secundam, priusquam progrediaris ad tertiam, idemque de cæteris dictum velim; nam singulas eo disposuimus ordine, ut quæ præcedit, necessaria sit ad percipiendas eas quæ sequuntur. Si aliqua sint in explicatione, quæ initio non intelligas, ipsum schema sæpius diligenter inspicies; ac vicissim si aliqua desint in schematibus, ex declarationibus ea supplebis. Lapsus verò quos deprehenderis, facilè pro tua benignitate, mihi, ut spero, condonabis.