THE SILLER CROUN

"And ye sall walk in silk attire,
And siller ha'e to spare,
Gin ye'll consent to be his bride,
Nor think o' Donald mair."

Oh, wha wad buy a silken goun
Wi' a puir broken heart?
Or what's to me a siller croun,
Gin' frae my luve I part?

The mind wha's every wish is pure
Far dearer is to me;
And ere I'm forced to break my faith,
I'll lay me doun and dee.

For I ha'e pledged my virgin troth
Brave Donald's fate to share;
And he has gi'en to me his heart,
Wi' a' its virtues rare.

His gentle manners wan my heart,
He gratefu' took the gift;
Could I but think to tak' it back,
It wad be waur than theft.

For langest life can ne'er repay
The love he bears to me;
And ere I'm forced to break my troth
I'll lay me doun and dee.

Susanna Blamire [1747-1794]