GUDLO XLIV. THE GIPSY AND HIS THREE SWEETHEARTS.
Yeckorus a tāno mush kaired his cāmmoben ta trin juvas kett’nus an’ kek o’ the trin jinned yuv sus a pirryin’ ye waver dui. An ’covo ráklo jivved adrée a bitti tan pāsh the rikkorus side o’ the boro lun panni, an’ yeck rātti sār the chais welled shikri kett’nus a lester, an’ kek o’ the geeris jinned the wavers san lullerin adoi. So they jālled sār-sigán kett’nus, an’ rākkered, “Sarshan!” ta yeck chairus. An’ dovo ráklo didn’t jin what jūva kaumed lester ferridīrus, or kun yuv kaumed ye ferridīrus, so sār the shtor besht-a-lay sum, at the habbenescro, and yuv del len habben an’ levinor. Yeck hawed booti, but ye waver dui wouldn’t haw kek, yeck pii’d, but ye wāver dui wouldn’t pi chommany, ’cause they were sār hunnali, and sookeri an’ kūried. So the ráklo penned lengis, yuv sos atrash if yuv lelled a jūva ’at couldn’t haw, she wouldn’t jiv, so he rummored the rákli that hawed her hābben.
All’ers haw sār the hābben foki banders apré a tute, an’ tute’ll jāl sikker men dūsh an’ tukli.