IX.
Lete thi worde be clere and trwe in kynde.
Appollo shall gif it the in mynde,
For he by no mene may non ordure
Suffir no wyse vndere couerture.
Appollo or Phebus, that is the sone, to whom the Sonday is yoven and allsoo the metall that is callyd golde. The sonne by hys clerenes shewyth thynges that be hidde; and therefore trewth, the whiche is clere and shewith secrete thynges, may be yofe to hyme. The which vertue shulde be in the herte and in the mowthe of euery good knyghte. And to this purpose seyth Hermes, “Love Godde, trowthe euer, and gyffe good counsell.”
Apollo, the whiche is to sey the sonne, by whom we notyfye trowthe, we may take that man shulde haue in hys mouth the trwthe of the very knyght Jhesu Cryst and flee all falsenes. As Cassiodyr seyth in the booke of Praysyng of Seynt Powle,[[184]] “The condicion of falsenes ys swche that, where as it hath no geyneseyyng, yit it falleth in hym selphe; butte the condycion of trowth is to the contrary, ffor it is so sete that the more geyneseynges of aduersytes that it hath, the more it encresyth and reysyth hym selphe.” To this purpose seith Holy Scripture, “Super [omnia vincit veritas].”[[185]]