LXX.
I seye go notte to the yates of helle
For to seke Euridice be my counselle.
Litell he wanne there with his harpe and play,
Orpheus, as that I haue ofte herd seye.
Orpheus the poyete, the which harpede so well,[[428]] a fabil seith that he maried hym to Euridice, but on the day of mariage thei wente to disporte theyme in a medwe barefoote ffor the grete hete of the sonne, and an herde coveytyd that fayyr woman and ranne ffor to a rauysshed hyr, and as she flede afore hym for fere of hym she was betyn with a serpent that was hyd wnder the gresse of the medwe, and within a litell while after the mayden dyed. Orpheus was ryght heuy of that mysse aventure; yit he tooke his harpe and wentte to þe yattes of helle in the dyrke waly afore the helle paleys, and thanne he begane to harppe pytously and he pleyyd so swetely that all the tormentes off helle cesyd and all the helly offices lefte there besynes for to here the sownde of the harppe, and anamly Proserpyne, the godes off helle, was meuyd with grete pete. Than Pluto, Lucifere, Cerebrus and Acaron,[[429]] the which for the harpor sawe that the offices off hell peynnes lefte and cesed, toke hym hys wyff vpon a condicion that he shulde goo afore and sche after, and that he shulde notte loke behynde hym to he come owt of the valy of helle, and yff he looked behynde hym he shuld lefe hire. Opon this condicion she was delyuered to hym ayen. So Orpheus wente afore and his loue after, but he that was to hoote in loue, the which desired to beholde hire, myght not kepe hym from lokyng ayen after his loue, and anoon as [he] loked byhynd hym Euredice partyd from hyme and was ayen in helle, so that he myght no more haue hire. This fable may be vndyrstondyn in many maneres. It myght be so that some man had his wyff takyn fro hyme and he had getten hire ayen; on the same wyse it may be of a castell or of anothir thyng. But to owre purpose it may be seide that he seketh veryly Euredice in hell, the which sekyth an inpossibyl thyng and, thowgh a man may notte recouer that, he owghte not to be wrothe. Salamon seyth the same, “It is a foly thyng,” he seith, “to seke that the which is impossybylle to be hadde.” |f. 52.|
Be that a man shulde not goo to seke Euredice in hell, we may vndirstond that the goode speryte shulde aske ne requyre of God no thyng that is meruellious,[[430]] ne that mervell to be thyng oon, that is to sey, to tempte God. And Seynt Austyn seith opon Seynt John Gospell that Godes creature is not exavced when he requiryth a thyng the which may not be doone or shuld not be doone, or a thyng the which he wolde vse amysse yf that it were grawntyd hyme, or ell a thyng that shuld hurte the sowle yf it were exauuced. And therfor it comyth of the mercy off God, if he gyff not to a creature a thyng the which he knowyth he wolde vse amysse. To this purpose Seynt James the apostell seyth in his Pistell, [“Petitis et non accipitis eo quod male petatis”].[[431]]