AN ANGLO-NORMAN SONG.
Seignors ore entendez a nus,
De loinz sumes venuz a wous,
Pur quere Noel;
Car lem nus dit que en cest hostel
Soleit tenir sa feste anuel
A hi cest jur.
Deu doint a tus icels joie d'amurs
Qi a Danz Noel ferunt honors.
Seignors jo vus di por veir
Ke Danz Noel ne velt aveir
Si joie non;
E repleni sa maison,
De payn, de char & de peison,
Por faire honor
Deu doint a tuz ces joie damur.
Seignors il est crié en lost,
Qe cil qui despent bien et tost,
E largement;
E fet les granz honors sovent
Deu li duble quanque il despent
Por faire honor.
Deu doint a.
Seignors escriez les malveis,
Car vus nel les troverez jameis
De bone part:
Botun, batun, ferun gruinard,
Car tot dis a le quer cuuard
Por faire honor.
Deu doint.
Noel beyt bien li vin Engleis
E li Gascoin & li Franceys
E l'Angevin:
Noel fait beivre son veisin,
Si quil se dort, le chief enclin,
Sovent le jor.
Deu doint a tuz cels.
Seignors jo vus di par Noel,
E par li sires de cest hostel,
Car bevez ben:
E jo primes beurai le men,
Et pois apres chescon le soen,
Par mon conseil,
Si jo vus di trestoz Wesseyl
Dehaiz eit qui ne dirra Drincheyl!