APPENDIX XXXV

[P. 503, n. 2]

STATE PAPERS, FOREIGN

Elizabeth, Vol. CXXXI, No. 895

[Henry III to Queen Elizabeth]

Treshaulte tresexellente, et trespuissante princesse Nostre treschere et tresamee bonne seur et cousine ayant entendu le trespas ces jours passez advenu du feu Roy nostre trecher s^r et frere nous en avons receu ung tresgrand regret enuy & desplaisir pour la singulliere affection et fraternelle amitie quil nous a tousjours portee et demonstrée par tous bons offices. Et aussy pour la perte grande qui en demeure generallement a toute la Chrestiente, et a nous particulierement, qui luy avions tant dobligation comme nous avons encores en sa memoire, pour tant d’honneurs et de faveurs quil luy a pleu tousjours nous departir de son vivant. Ce que saichant que les princes ses voisins auront pareillement porte avec douleur, et mesmement vous, avec qui il avoit et a tousjours eu si bonne & parfaicte amitye, voisinaige et intelligence. Nous avons pense estre bien convenable a l’amitye mutuelle qui est aussy entre nous noz Royaumes et pais de nous en condoulloir avec vous, comme nous faisons par la presente en attendant qu’estant arrivé en nostre Royaume de France (ainsy que nous l’esperons bien tost avec layde de Dieu) nous puissions nous acquicter plus dignement de cest office. Voullans bien vous dire & asseurer cependant que si vous avez congneu le feu Roy notred. S^r et frere desireulx de conserver la bonne et sincere amitye voisinance et intelligence que vous aviez ensemble, vous n’en debuez pas moings attendre & esperer de nous son successeur a la corone de France Ne voullant seullement continuer en lad. amitye, mais la fortifier asseurer et augmenter par tous honnorables & dignes offices que doibuent les princes amis les ungz aux autres ainsy qu’avons donne charge au s^r de la Mothe Fennelon vous faire entendre que vous prions recevoir et avoir agreable aupres de vous pour y estre notre conseiller et ambassadeur resident, tout ainsy quil estoit du feu roy nostre feu S^r et frere Et ne pouvons aussy trouver que tresbon l’exercice quil a faict de ladicte legation de puis ledict decedz advenu, tant suivant les tres de feu notred. S^r & frere que celles de la Royne nostre treshonnoree dame et mere qui en avoit tout pouvoir et a laquelle nous envoyons presentement le nostre le plus ample quil nous est possible. Saichant combien elle merite de cested. corone, et combien elle sest aussy tousjours rendue affectionnée au bien de nous tous ses enfens, et des affaires et prosperite de notred. Royaulme, vous priant croire ledict s^r de la Mothe de ce quil vous dire sur tout ce que dessus et y adjouster foy comme feriez a nous mesmes Qui prions Dieu treshaulte tresexellente et trespuissante princesse Nostre treschere et tresamee bonne seur et cousine vous avoir en sa tressainte et tresdigne garde. Escript a Cracovye le xv^ne jour de Juing 1574.

[Signed] Vostre bon frere et cousin

HENRY
Warsevicz

[Addressed] A treshaulte tresexcellente et
trespuissante princesse Nostre
treschere et tresamee bonne
seur & cousine la Royne
D’Angleterre.

[Endorsed] June xv^th 1574.

From the K. of Polonia to her Ma^tie. Dated at Cracovia. He condolethe the deathe of the K. his brother offreth and requireth lyke contynewance of amitie as was betwene her and his brother Desiereth her Ma^tie to accept Mon^sr de la Mothe for his Ambassadeur.