I
Jour de Dièu, queto caud! Bèu tèms pèr la cigalo
Que, trefoulido, se regalo
D’uno raisso de fiò; bèu tèms pèr la meissoun.
Dins lis erso d’or, lou segaire,
Ren plega, pitre au vent, rustico e canto gaire:
Dins soun gousiè, la set estranglo la cansoun.
Tèms benesi pèr tu. Dounc, ardit! cigaleto,
Fai-lei brusi, ti chimbaleto,
E brandusso lou ventre à creba ti mirau.
L’Ome enterin mando la daio,
Que vai balin-balan de longo e que dardaio
L’uiau de soun acié sus li rous espigau.
Plèn d’aigo pèr la péiro e tampouna d’erbiho
Lou coufié sus l’anco pendiho.
Se la péiro es au frès dins soun estui de bos
E se de longo es abèurado,
L’Ome barbelo au fiò d’aqueli souleiado
Que fan bouli de fes la mesoulo dis os.
[[16]]
Tu, Cigalo, as un biais pèr la set: dins la rusco
Tendro e jutouso d’uno busco,
L’aguio de toun bè cabusso e cavo un pous.
Lou sirò monto pèr la draio.
T’amourres à la fon melicouso que raio,
E dòu sourgènt sucra bèves lou teta-dous.
Mai pas toujour en pas, oh! que nàni: de laire,
Vesin, vesino o barrulaire,
T’an vist cava lou pous. An set; vènon, doulènt,
Te prène un degout pèr si tasso.
Mesfiso-te, ma bello: aqueli curo-biasso,
Umble d’abord, soun lèu de gusas insoulènt.
Quiston un chicouloun de rèn; pièi de ti resto
Soun plus countènt, ausson la testo
E volon tout. L’auran. Sis arpioun en rastèu
Te gatihoun lou bout de l’alo.
Sus ta larjo esquinasso es un mounto-davalo;
T’aganton pèr lou bè, li bano, lis artèu;
Tiron d’eici, d’eilà. L’impaciènci te gagno.
Pst! pst! d’un giscle de pissagno
Aspèrges l’assemblado e quites lou ramèu.
T’en vas bèn liuen de la racaio, [[17]]
Que t’a rauba lou pous, e ris, e se gougaio,
E se lipo li brego enviscado de mèu.
Or d’aqueli boumian abèura sens fatigo,
Lou mai tihous es la fournigo.
Mousco, cabrian, guespo e tavan embana,
Espeloufi de touto meno,
Costo-en-long qu’à toun pous lou souleias ameno,
N’an pas soun testardige à te faire enana.
Pèr t’esquicha l’artèu, te coutiga lou mourre,
Te pessuga lou nas, pèr courre
A l’oumbro de toun ventre, osco! degun la vau.
Lou marrit-péu prend pèr escalo
Uno patto e te monto, ardido, sus lis alo,
E s’espasso, insoulènto, e vai d’amont, d’avau.