TO JOHN KENNEDY.
Farewell, dear friend! may guid luck hit you,
And ‘mang her favourites admit you!
If e’er Detraction shore to smit you,
May nane believe him!
And ony deil that thinks to get you,
Good Lord deceive him!
R. B.
Kilmarnock, August, 1786
LXXVII.
[Cromek found these characteristic lines among the poet’s papers.]
There’s naethin like the honest nappy!
Whaur’ll ye e’er see men sae happy,
Or women, sonsie, saft an’ sappy,
’Tween morn an’ morn
As them wha like to taste the drappie
In glass or horn?
I’ve seen me daezt upon a time;
I scarce could wink or see a styme;
Just ae hauf muchkin does me prime,
Ought less is little,
Then back I rattle on the rhyme,
As gleg’s a whittle.