Theniel Menzies’ Bonie Mary
Air—“The Ruffian’s Rant,” or “Roy’s Wife.”
In comin by the brig o’ Dye, At Darlet we a blink did tarry; As day was dawnin in the sky, We drank a health to bonie Mary. Chorus.—Theniel Menzies’ bonie Mary, Theniel Menzies’ bonie Mary, Charlie Grigor tint his plaidie, Kissin’ Theniel’s bonie Mary. Her een sae bright, her brow sae white, Her haffet locks as brown’s a berry; And aye they dimpl’t wi’ a smile, The rosy cheeks o’ bonie Mary. Theniel Menzies’ bonie Mary, &c. We lap a’ danc’d the lee-lang day, Till piper lads were wae and weary; But Charlie gat the spring to pay For kissin Theniel’s bonie Mary. Theniel Menzies’ bonie Mary, &c.
The Bonie Lass Of Albany1
Tune—“Mary’s Dream.”
My heart is wae, and unco wae, To think upon the raging sea, That roars between her gardens green An’ the bonie Lass of Albany. This lovely maid’s of royal blood That ruled Albion’s kingdoms three, But oh, alas! for her bonie face, They’ve wrang’d the Lass of Albany. In the rolling tide of spreading Clyde There sits an isle of high degree, And a town of fame whose princely name Should grace the Lass of Albany. But there’s a youth, a witless youth, That fills the place where she should be; We’ll send him o’er to his native shore, And bring our ain sweet Albany. Alas the day, and woe the day, A false usurper wan the gree, Who now commands the towers and lands— The royal right of Albany. We’ll daily pray, we’ll nightly pray, On bended knees most fervently, The time may come, with pipe an’ drum We’ll welcome hame fair Albany. [Footnote 1: Natural daughter of Prince Charles Edward.]