G. JUDAS. Trinity College (Cambridge) MS. B. 14. 39 (about 1300), f. 34 a.
Hit wes upon a Scere Þorsday þat vre Louerd aros;
Ful milde were þe wordes He spec to Iudas:
Iudas, þou most to Iurselem, oure mete for to bugge;
Þritti platen of seluer þou bere upo þi rugge.
Þou comest fer i þe brode stret, fer i þe brode strete; 5
Summe of þine cunesmen þer þou meist imete.
Imette wid is soster, þe swikele wimon:
'Iudas, þou were wrþe me stende þe wid ston, (bis)
For þe false prophete þat tou bileuest upon.'
'Be stille, leue soster, þin herte þe tobreke! 10
Wiste min Louerd Crist, ful wel He wolde be wreke.'
'Iudas, go þou on þe roc, heie upon þe ston,
Lei þin heued i my barm, slep þou þe anon.'
Sone so Iudas of slepe was awake,
Þritti platen of seluer from hym weren itake. 15
He drou hymselve bi þe top, þat al it lauede a blode;
Þe Iewes out of Iurselem awenden he were wode.
Foret hym com þe riche Ieu þat heiste Pilatus:
'Wolte sulle þi Louerd, þat hette Iesus?'
'I nul sulle my Louerd for nones cunnes eiste, 20
Bote hit be for þe þritti platen þat He me bitaiste.'
'Wolte sulle þi Lord Crist for enes cunnes golde?'
'Nay, bote hit be for þe platen þat He habben wolde.'
In him com ur Lord gon, as is postles seten at mete:
'Wou sitte ye, postles, ant wi nule ye ete? (bis) 25
Ic am iboust ant isold today for oure mete.'
Up stod him Iudas: 'Lord, am I þat?
I nas neuer o þe stude þer me Þe euel spec.'
Up him stod Peter, ant spec wid al is miste:
'Þau Pilatus him come wid ten hundred cnistes, (bis) 30
Yet ic wolde, Louerd, for Þi loue fiste.'
'Stille þou be, Peter! Wel I þe icnowe;
Þou wolt fursake me þrien ar þe coc him crowe.'