IX. HUNFERTH OBJECTS TO BEÓWULF.
Ûnferð maðelode, Ecglâfes bearn,
þe ät fôtum sät freán Scyldinga;
onband beadu-rûne (wäs him Beówulfes sîð,
môdges mere-faran, micel äf-þunca,
forþon þe he ne ûðe, þät ænig ôðer man
æfre mærða þon mâ middan-geardes
gehêdde under heofenum þonne he sylfa):
"Eart þu se Beówulf, se þe wið Brecan wunne,
"þær git for wlence wada cunnedon
"and for dol-gilpe on deóp wäter
"aldrum nêðdon? Ne inc ænig mon,
"sorh-fullne sîð; þâ git on sund reón,
"þær git eágor-streám earmum þehton,
"mæton mere-stræta, mundum brugdon,
"glidon ofer gâr-secg; geofon ýðum weól,
"wintres wylme. Git on wäteres æht
"seofon niht swuncon; he þe ät sunde oferflât,
"häfde mâre mägen. Þâ hine on morgen-tîd
"on Heaðo-ræmas holm up ätbär,
"þonon he gesôhte swæsne êðel
"leóf his leódum lond Brondinga,
"freoðo-burh fägere, þær he folc âhte,
"burg and beágas. Beót eal wið þe
"sunu Beánstânes sôðe gelæste.
"Þonne wêne ic tô þe wyrsan geþinges,
"þeáh þu heaðo-ræsa gehwær dohte,
"grimre gûðe, gif þu Grendles dearst
"niht-longne fyrst neán bîdan!"
Beówulf maðelode, bearn Ecgþeówes:
"Hwät þu worn fela, wine mîn Ûnferð,
"beóre druncen ymb Brecan spræce,
"sägdest from his sîðe! Sôð ic talige,
"þät ic mere-strengo mâran âhte,
"earfeðo on ýðum, þonne ænig ôðer man.
"Wit þät gecwædon cniht-wesende
"and gebeótedon (wæron begen þâ git
"on geogoð-feore) þät wit on gâr-secg ût
"aldrum nêðdon; and þät geäfndon swâ.
"Häfdon swurd nacod, þâ wit on sund reón,
"heard on handa, wit unc wið hron-fixas
"werian þôhton. Nô he wiht fram me
"flôd-ýðum feor fleótan meahte,
"hraðor on holme, nô ic fram him wolde.
"fîf nihta fyrst, ôð þät unc flôd tôdrâf,
"wado weallende, wedera cealdost,
"heaðo-grim andhwearf; hreó wæron ýða,
"þær me wið lâðum lîc-syrce mîn,
"heard hond-locen, helpe gefremede;
"beado-hrägl broden on breóstum läg,
"golde gegyrwed. Me tô grunde teáh
"grim on grâpe: hwäðre me gyfeðe wearð,
"hilde-bille; heaðo-ræs fornam