O’er the Muir amang the Heather.
JEAN GLOVER
Comin’ through the craigs o’ Kyle,
Amang the bonnie bloomin’ heather,
There I met a bonnie lassie,
Keepin’ a’ her ewes thegither.
O’er the muir amang the heather,
O’er the muir amang the heather,
There I met a bonnie lassie
Keepin’ a’ her ewes thegither.
Says I, My dear, where is thy hame?
In muir or dale, pray tell me whether?
Says she, I tent the fleecy flocks
That feed amang the bloomin’ heather.
O’er the muir, etc.
We laid us down upon a bank,
Sae warm and sunnie was the weather;
She left her flocks at large to rove
Amang the bonnie bloomin’ heather.
O’er the muir, etc.
While thus we lay, she sang a sang,
Till echo rang a mile and further;
And aye the burden of the sang
Was, O’er the muir amang the heather.
O’er the muir, etc.
She charmed my heart, and aye sin syne
I couldna’ think on ony ither;
By sea and sky! she shall be mine,
The bonnie lass amang the heather.
O’er the muir amang the heather,
O’er the muir amang the heather,
There I met a bonnie lassie
Keepin’ a’ her flocks thegither.