The Land o’ the Leal.
LADY CAROLINE NAIRNE
I’m wearin’ awa, John,
Like snaw-wreaths in thaw, John,
I’m wearin’ awa
To the land o’ the leal.
There’s nae sorrow there, John,
There’s neither cauld nor care, John,
The day is aye fair
In the land o’ the leal.
Our bonnie bairn’s there, John,
She was baith gude and fair, John,
And, oh, we grudged her sair
To the land o’ the leal.
But sorrow’s sel’ wears past, John,
And joy’s a-comin’ fast, John,
The joy that’s aye to last,
In the land o’ the leal.
Oh, dry your glist’ning ee, John,
My saul langs to be free, John,
And Angels beckon me
To the land o’ the leal.
O haud ye leal and true, John,
Your day it’s wearin’ through, John,
And I’ll welcome you
To the land o’ the leal.
Now fare-ye-weel, my ain John,
The warld’s cares are vain, John,
We’ll meet and we’ll be fain
In the land o’ the leal.