XI.
Much they marvel to see a man and a horse 232
Ther wat3 lokyng on lenþe, þe lude to be-holde,
For vch mon had meruayle quat hit mene my3t,
Þat a haþel & a horse my3t such a hwe lach,
As growe grene as þe gres & grener hit semed,
Þen grene aumayl on golde lowande bry3ter;
Al studied þat þer stod, & stalked hym nerre,
Wyth al þe wonder of þe worlde, what he worch schulde.
For fele sellye3 had þay sen, bot such neuer are,
For-þi for fantoum & fayry3e þe folk þere hit demed;
Þer-fore to answare wat3 ar3e mony aþel freke,
& al stouned at his steuen, & stonstil seten,
In a swoghe sylence þur3 þe sale riche
As al were slypped vpon slepe so slaked hor lote3
in hy3e;
I deme hit not al for doute,
Bot sum for cortaysye,
Bot let hym þat al schulde loute,
Cast vnto þat wy3e.