THE STORY OF THE LAND FACTOR.
"There maun hae been something that weighed on his mind," remarked one of the women, "though your faither had nae power to get it frae him. I mind that, whan I was a lassie, there happened something o' the same kind. My faither had been a tacksman on the estate o' Blackhall; an', as the land was sour an' wat, an' the seasons for awhile backward, he aye contrived—for he was a hard-working, carefu' man—to keep us a' in meat and claith, and to meet wi' the factor. But, wae's me! he was sune taen frae us. In the middle o' the seed-time, there cam a bad fever intil the country; an' the very first that died o't was my puir faither. My mither did her best to keep the farm, an' haud us a' thegither. She got a carefu', decent lad to manage for her, an' her ain ee was on everything; an' had it no been for the cruel, cruel factor, she micht hae dune gay weel. But never had the puir tenant a waur friend than Ranald Keilly. He was a toun writer, an' had made a sort o' livin, afore he got the factorship, just as toun writers do in ordinar. He used to be gettin the haud o' auld wives' posies when they died; an' there was aye some litigious, troublesome folk in the place, too, that kept him doing a little in the way o' troublin their neebors; an' sometimes, when some daft, gowkit man, o' mair means than sense, couldna mismanage his ain affairs aneugh, he got Keilly to mismanage them for him. An' sae he had picked up a bare livin in this way; but the factorship made him just a gentleman. But, oh, an ill use did he mak o' the power that it gied him owre puir, honest folk. Ye maun ken that, gin they were puir, he liked them a' the waur for being honest; but, I daresay, that was natural enough for the like o' him. He contrived to be baith writer an' factor, ye see; an' it wad just seem that his chief aim in the ae capacity was to find employment for himsel in the ither. If a puir tenant was but a day behind-hand wi' his rent, he had creatures o' his ain that used to gang half-an'-half wi' him in their fees; an' them he wad send aff to poind him an' then, if the expenses o' the poindin werena forthcoming as weel as what was owing to the master, he wad hae a roup o' the stocking twa-three days after; an' anither account, as a man o' business, for that. An' when things were going dog-cheap—as he took care that they should sometimes gang—he used to buy them in for himsel, an' pairt wi' them again for maybe twice the money. The laird was a quiet, silly, good-natured man; an' though he was tauld weel o' the factor at times—ay, an' believed it, too—he just used to say, 'Oh, puir Keilly, what wad he do gin I were to pairt wi' him? He wad just starve.' An' oh, sirs, his pity for him was bitter cruelty to mony, mony a puir tenant, an' to my mither amang the lave.
"The year after my faither's death was cauld an' wat, an' oor stuff remained sae lang green, that we just thocht we wouldna get it cut ava. An' when we did get it cut, the stacks, for the first whilie, were aye heatin wi' us; an' when Marti'mas came, the grain was still saft an' milky, an' no fit for the market. The term came round, an' there was little to gie the factor in the shape o' money, though there was baith corn an' cattle; an' a' that we wanted was just a little time. An—but we had fa'en into the hands o' ane that never kent pity. My mither hadna the money gin, as it were, the day, an' on the morn, the messengers came to poind. The roup was no a week after; an', oh, it was a grievous sicht to see hoo the crop an' the cattle went for just naething. The farmers were a' puirly aff wi' the late har'st, an' had nae money to spare; an' sae the factor knocked in ilka thing to himsel, wi' hardly a bid against him. He was a rough-faced, little man, wi' a red, hooked nose—a guid deal gien to whisky, an' vera wild an' desperate when he had taen a glass or twa aboon ordinar; an', on the day o' the roup, he raged like a perfect madman. My mither spoke to him again an' again, wi' the tear in her ee, an' implored him, for the sake o' the orphan an' the widow, no to harry hersel and her bairns; but he just cursed an' swore a' the mair, an' knocked down the stacks an' the kye a' the faster; an' whan she spoke to him o' the Ane aboon a', he said that Providence gied lang credit, an' reckoned on a lang day, an' that he wad tak him intil his ain hands. Weel, the roup cam to an end, an' the sum o' the whole didna come to meikle mair nor the rent, an' clear the factor's lang, lang account for expenses; an' at nicht my mither was a ruined woman. The factor staid up late an' lang, drinking wi' some creatures o' his ain, an' the last words he said, on going to his bed, was, that he hadna made a better day's wark for a twelvemonth. But, Gude tak us a' in keeping! in the morning he was a corp—a cauld, lifeless corp, wi' a face as black as my bannet.
"Weel, he was buried, an' there was a grand character o' him putten in the newspapers, an' we a' thocht we were to hear nae mair aboot him. My mither got a wee bittie o' a house on the farm o' a neebor, an' there we lived dowie aneugh; but she was aye an eident, working woman, an' she now span late an' early for some o' her auld freends, the farmers' wives; an' her sair-won penny, wi' what we got frae kindly folk wha minded us in better times, kept us a' alive. Meanwhile, strange stories o' the dead factor began to gang aboot the kintra. First, his servants, it was said, were hearing aye curious noises in his counting office. The door was baith locked an' sealed, waiting till his freends would cast up, for there were some doots aboot them; but, locked an' sealed as it was, they could hear it opening an' shutting every nicht, an' hear a rustling among the papers, as gin there had been half-a-dozen writers scribbling among them at ance. An' then, Gude preserve us a'! they could hear Keilly himself, as if he were dictating to his clerk. An', last o' a', they could see him in the gloamin, nicht an' mornin, ganging aboot his hoose, wringing his hands, an' aye, aye muttering to himsel aboot roups and poindings. The servant-girls left the place to himsel; an' the twa lads that wrought his farm, an' slept in a hay-loft, were sae disturbed, nicht after nicht, that they had jist to leave it to himsel too.
"My mither was ae nicht wi' some o' her spinnin at a neeborin farmer's—a worthy, God-fearing man, an' an elder o' the kirk. It was in the simmer time, an' the nicht was bricht and bonny; but, in her backcoming, she had to pass the empty hoose o' the dead factor, an' the elder said that he would tak a step hame wi' her, for fear she michtna be that easy in her mind. An' the honest man did sae. Naething happened them in the passing, except that a dun cow, ance a great favourite o' my mither's, came up lowing to them, puir beast! as gin she wauld hae better liked to be gaun hame wi' my mither than stay where she was. But the elder didna get aff sae easy in the backcoming. He was passing beside a thick hedge, when what does he see but a man inside the hedge, taking step for step wi' him as he gaed! The man wore a dun coat, an' had a huntin-whip under his arm, an' walked, as the elder thought, very like what the dead factor used to do when he had gotten a glass or twa aboon ordinar. Weel, they cam to a slap in the hedge, an' out cam the man at the slap; an', Gude tak us a' in keeping! it was, sure aneugh, the dead factor himsel! There were his hook nose, an' his rough, red face—though it was, maybe, bluer noo than red; an' there were the boots an' the dun coat he had worn at my mither's roup, an' the very whip he had lashed a puir gangrel woman wi' no a week afore his death. He was muttering something to himsel; but the elder could only hear a wordie noo an' then. 'Poind and roup,' he would say, 'poind and roup;' an' then there would come out a blatter o' curses—'Hell! hell! an' damn, damn!' The elder was a wee fear-stricken at first, as wha wadna? but then the ill words, an' the way they were said, made him angry—for he could never hear ill words withoot checking them—an' sae he turned round wi' a stern brow, an' asked the appearance what it wanted, an' why it should hae come to disturb the peace o' the kintra, and to disturb him? It stood still at that, an' said, wi' an awsome grane, that it couldna be quiet in the grave till there were some justice done to Widow Stuart. It then tauld him that there were forty gowd guineas in a secret drawer in his desk, that hadna been found, an' tauld him where to get them, an' that he wad need gang wi' the laird an' the minister to the drawer, an' gie them a' to the widow. It couldna hae rest till then, it said, nor wad the kintra hae rest either. It willed that the lave o' the gear should be gien to the puir o' the parish; for nane o' the twa folk that laid claim to it had the shadow o' a richt. An' wi' that the appearance left him. It just went back through the slap in the hedge; an', as it stepped owre the ditch, vanished in a puff o' smoke.
"Weel, but to cut short a lang story, the laird and the minister were at first gay slow o' belief—no that they misdoubted the elder, but they thocht that he must hae been deceived by a sort o' waking dream. But they soon changed their minds, for, sure enough, they found the forty guineas in the secret drawer. An' the news they got frae the south about Keilly was just as the appearance had said—no ane mair nor anither had a richt to his gear, for he had been a foundlin, an' had nae freends. An' sae my mither got the guineas, an' the parish got the rest, an' there was nae mair heard o' the apparition. We didna get back oor auld farm; but the laird gae us a bittie that served oor turn as weel; an', or my mither was ca'ed awa frae us, we were a' settled in the warld, an' doin for oorsels."