A Man’s a Man for a’ That.
Is there for honest poverty,
That hangs his head, and a’ that?
The coward slave we pass him by,
We dare be puir for a’ that.
For a’ that and a’ that,
Our toil’s obscure and a’ that,
The rank is but the guinea’s stamp,
The man’s the gowd for a’ that,
What though on hamely fare we dine,
Wear hodden gray and a’ that?
Gie fools their silks and knaves their wine,
A man’s a man for a’ that.
For a’ that and a’ that,
Their tinsel show and a’ that;
The honest man though e’er sae puir,
Is king o’ men for a’ that.
Then let us pray that come it may,
As come it will for a’ that;
That sense and worth o’er a’ the earth,
May bear the gree, and a’ that.
For a’ that and a’ that,
It’s coming yet, for a’ that;
That man to man the warld o’er,
Shall brithers be for a’ that.