Wyclif—1380
If I speke with tungis of men and of aungels, and I haue not charite, I am made as bras sownynge or a cymbal tinkynge, and if I haue profecie, and knowe alle mysteries, and al kynnynge, and if I haue al feith so that I meue hillis fro her place and I haue not charite I am nouzt, and if I departe alle my godis in to metis of pore men, and if I bitake my bodi so that I brenne, and I haue not charite if profetith to me no thing, charite is pacient, it is benyngne.
charite enuyeth not, it doth not wickidli it is not blowun it is not coueitous, it sekith not the thingis that ben his owne, it is not stired to wraththe, it thenkith not yuel, it ioieth not on wickidnesse, but it ioieth to gidre to truthe, it suffrith alle thingis: it beleueth alle thingis, it hopith alle thingis it susteyneth alle thingis, charite fallith neuer doun, whether profecies schuln be voidid, ether langagis schulen cease: ether science schal be distried,
for aparti we knowen and aparti we profecien, but whanne that schal come that is perfizt, that thing that is of parti schal be avoidid, whanne I was a litil child, I thouzt as a litil child, but whanne I was made a man I voidid tho thingis that weren of a litil child, and we seen now bi a myrrour in derknesse: but thanne face to face, now I knowe of parti, but thanne I schal knowe as I am knowen, and now dwellen feith hope and charite these thre: but the moost of thes is charite.