Le .x. chappitre
Les empereurs roys ducs contes et princes
Jadis regnans que sont ilz devenus
Les empires royaulmes et provinces
Tindrent soubz pié mais nichilominus
Laissé ont tout et en terre mis nus
Mangés de vers sont et leurs corps pourris
Qui furent tant bien parés et nourris
Aux eglises regarde et cymetieres
Sans ceulx qui sont autre part entassés
Et aux charniers et aux aultres frontieres
Les ossemens de tant de trespassés
Las en verras d'ungs et d'aultres assés
Mais tu n'auras d'aucun d'eux congnoissance
Qui fut noble homme ou vilain de naissance
Se descendu tu es du sang royal
Ou d'aultre lieu que bien noble on renomme
Pour quoy veus tu se tu n'es desloyal
Que virtueux et noble homme on te nomme
Noble et vilain vindrent du premier homme
Mais tant soit noble il est vilain parfait
Qui vilain fait a son escient fait
T'est il advis que sus en paradis
Soit saint pierre pourtant s'il fut pecheur
Plus bas q'ung roy si le roy fust jadis
Plus hault que luy sur terre homme pecheur
Tu n'orras pas prescher a bon prescheur
Quod acceptor personarum soit dieu
Car les plus bas met souvent en hault lieu
Mais les mauvais puissans evidenter
Divers tormens souffreront puissanment
Juxta illud potentes potenter
Patientur tormens incessanment
Par l'euvangile on peut savoir comment
Ceci est vray ou il fait mention
De divite mis a dannation
Ubi risus ubi jactantia
Ubi jocus et ubi arrogance
De tanta hic joye et leticia
Quanta illic et tristesse et meschante
Après luxure arderont sans doubtance
Et de leur feste et exultation
Seront de la en tribulation
Car comme on dit in apocalipsi
Ceulx qui deça se glorifieront
En delices in inferno ipsi
Divers tourmens sans fin endureront
Et de tant plus comme ilz s'exausseront
De tant plus fort seront humiliés
Et des liens de l'ennemi liés
Et tout ce qu'est escheut ou escherra
Aux desusdictz te peut il eschoir
Et s'il leur est mescheut ou mescherra
Semblablement te peut il meschoir
Et aussi bien peux errer et choir
Comme ilz sont cheus et comme ilz ont erré
Car tu es homme et de limo terre
In quam terram cras vel modo
Carissime frater reverteris
Car tu mourras et ne sçais quomodo
Ubi quando nec diem funeris
Et postquam scis quod tu morieris
Et mort t'atant par tout pour deceveoir
Soies par tout prest pour la recevoir
Soions tousjours comme les sages vierges
En attendant les peuples desja prests
Qui leurs lampes plus ardantes que cierges
Tindrent cleres en faisant leurs aprests
D'estre aux nopces bien parees après
Le grant seigneur sponsum immortalem
Affin d'entrer dedans hierusalem
Trescher frere si carnem sequeris
C'est a dire luxure auchunement
Saiches pour vray quod punitus eris
En l'autre monde in carne proprement
Si vestemens tu quiers pour ornemens
Ta couverture erunt vermes certe
Et tinea sternetur super te
Car dieu qui est tresraisonnable juge
Fort patient et doulx ne jugera
Jamais homme ne n'a jugé ne juge
Tant est juste que selon qu'il fera
Car il rendra secundum opera
Peine aux mauvais qui l'auront desservi
Et joye aux bons qui l'auront bien servi
Qui diligit plusfort mundum istum
Qui tant est faulx mauvais et decevable
Quam dominum nostrum jesum christum
Et a ce ciel plus que cloistre aggreable
Gloutonnie que abstinence amiable
Et est lubrique en la fin peribit
Le dyable ensuyt et en enfer ibit
O du pecheur anima misera
Qui n'as icy tant soit peu de demeure
O peccator miser considera
Diem mortis que tu ne sçais ne l'eure
Ton temps pardu sur toutes choses pleure
Meditando en quelle part yra
Ta povre ame quant elle partira
Quant tu seras in ultima gravi
Morbitate et ad mortem ductus
En attendant que tu soies ravi
Inter maris infernalis fluctus
Ubi semper clamor est et luctus
La quelle mer est de pleurs toute pleine
Pense en quel dueul tu mourras et quelle peine
Pense en quelle peine et en quantes douleurs
L'omme est inter longa suspiria
Pense comment en diverses couleurs
Son visage est quant tel martire y a
Quantes paours quanta martiria
Sentira l'omme et plus qu'oncques martir
Quant de son corps vouldra l'ame partir
Tunc veniet corpus in palorem
Viande a vers erit atque vermis
Convertetur en cendre et fetorem
Quant il sera en terre o les vers mis
Tout alentour seront les ennemis
Dudit corps mort pour en devorer l'ame
Devant qu'il soit en terre soubz la lamme