Le .xv. chappitre
Ubi ignis est materialis
Inestinguibile et froit inenarrable
Famus fetor vermis immortalis
Timor dolor et peine intollerable
Mors corporis et anime durable
Tousjours sans fin sans espoir ne mercy
Et plus d'orreur qu'on ne peut nommer cy
Quis poterit en ce feu perilleux
En tenebres aut cum sempiternis
Ardoribus n'en ce froit merveilleux
Habitare labas in advernis
Ou les dannés sont tous ars et ternis
Et facies eorum combuste
Qui in vita vixerunt injuste
Quant ses tormens desusdictz treshorribles
L'ame en enfer que dannata erit
Endurera et d'aultres trop terribles
Plusquam dici potest nec poterit
Audierit viderit senserit
Qualis quantus et quam magnus timor
Terror erit en elle atque tremor
Que mens potest penas et tormenta
Cogitare nec lingua dicere
Quis poterit en si grans tormenta
Habitare sive remanere
Et quis liber potest exponere
Ce que saint pol en enfer ravi vit
Qui des vivans nunc in terra vivit
Quid proderunt illis cupiditas
Dignitates sive potentie
Quid proderunt pompaque vanitas
Mundi hujus sive jactantie
Quid proderunt illis scientie
Des bien d'aultruy faulse detention
Honorisque mondaine ambicion
Quid proderunt illis appetitus
Luxurieque superfluitas
Cibi sive cibus exquisitus
Dulcis potusque curiositas
Du vestement et speciositas
Du chaussement etiam crapula
Ebrietas procedens a gula
Quid proderunt je t'en fais la demande
Des haulx chateaux alta constructio
Quid proderunt aussi je te demande
Des grans maisons hic acquisitio
Quid proderunt tunc aggregatio
De richesses puis qu'en la fin tout fault
Et que raison rendre au juge il en fault
Nunquid in hoc mundum defecerunt
Dimittendo se sic decipere
Nunquid viam aultre potuerunt
Que ceste cy plus seure arripere
Et animam suam eripere
Rugientis de ore leonis
Et de fauce horrendi drachonis
Hanc igitur lectionem legat
Qui d'amour est mondaine implicatus
In peccatis atque se protegat
Qui du vice est lubrique excecatus
Au quel plus plaist tant est hebetatus
Cadaveris lubrici voluptas
Que de son ame integra sanitas
Et plus studet hanc vitam terrenam
Circa martham dont la vie est active
Quam celestem circa magdalenam
Dont la vie es est cieulx contemplative
Et de mundo qui vie est transitive
Vult plus esse et lege mundana
Quam de christo et lege divina
Consideret diligenter et voye
Metuendam semitam qu'il tiendra
Et bien specule en ce mirouer la voye
Et premissis en la quelle il viendra
Et le chemin tenebreux qu'il tiendra
Les mains aussi par ou le fault passer
Quant de ce monde il vouldra trespasser
O peccator stultissime quare
Discrectio tua ista nescit
Quare non vis hec considerare
Et pource en toy grant orgueil tumescit
Luxuria etiam flamescit
Avarice similiter ligat
Et en ton cueur paresse fatigat
Ta pensee non ista cogitat
Et envie non vult hoc videre
Par quoy en toy ira exagitat
Atque gula vult te occidere
Quia non vis ista previdere
Pource en ton ame ou grant malice y a
Excruciat semper malicia
Quam horrida et quam innumera
Sunt tormenta c'est chose non pareille
Frigus ignis fetor et cetera
Ton oeil ne vit ne oyt ton oreille
En ta vie l'orreur qu'on t'apareille
Après ta mort si bien tu ne t'en gardes
Et ne t'en chault ne point tu n'y regardes
Et idcirco sepe efficeris
Comme a tout mal faire destinatus
Hic contumax igitur tu eris
In tormentis predictis dannatus
Puis que tu es ainsi obstinatus
Et ne te veulx de tes pechés douloir
Ne n'as aussi de t'amender vouloir
Quia sicut vir contempciosus
A divino opere recedis
Et ut piger et accidiosus
Negligenter ad deum accedis
Ne ne prens garde a ses faits n'a ses ditz
Ne n'as vouloir d'y mettre amendement
Ne de obeir a son commandement
Le .xv. chappitre
Quare quia providere non vis
Devant trespas post mortem quo vadis
Ne pensement tu n'as n'en toy advis
Que ton temps passe et in mortem cadis
Dont la gloire tu pers de paradis
Ou les benoists en la joye ou iront
De quatre dons principaulx jouiront
Premierement de de fruitione
Dei patris les benoists gaudebunt
Secundement et de visione
Celi justi qui ut sol fulgebunt
Auront liesse et quia videbunt
Assés d'aultres creatures moult belles
Precieusement cleres et corporelles
Après de la glorification
Du corps avec l'ame similiter
Quant ilz auront l'association
Des saintz anges et hommes pariter
Quant ilz pourront perpetualiter
Lassus user de ces dons et jouir
Bien se devront amer et resjouir
Pater atque natus cum flamine
Ung dieu en trois ibi videbitur
Face a face sine velamine
amabitur atque laudabitur
Ibi justus sans fin letabitur
Car il aura jeunesse sans vueillesse
Vie sans mort et joie sans tristesse
La est tousjours lumiere sans tenebre
La est beauté que nunquam palescit
La tousjours feste et nopces on celebre
La est amour qui nunquam tepescit
Senectusque que nunquam marcescit
Ibi nullus gemitus auditur
Ibi malum nec dolor sentitur
La omnia genera insonant
Musicorum en jubilation
La immensa domini resonant
Epulantes en exaltation
La oit on voix de consolation
Quia deus qui les acorde y a
Mis paix sans fin sine discordia
Ibi nichil quod deest amatur
Rien ne deffault in illa curia
Ibi nichil quod absit optatur
La est tout bien sine penuria
La voluntas sine injuria
Regnum sine commutatione
Et paix sine perturbatione
Et en ce lieu ou est leticia
Pax caritas fides fortitudo
Prudentia et temperantia
Justicia et mansuetudo
En deux s'estent hec beatitudo
C'est qu'on est las de tout mal en l'asence
Et de tout bien aussi en la presence
Saint paul qui fut spiritualiter
Raptus dicit oculus non vidit
Nec audivit auris similiter
Neque in cor hominis ascendit
Hoc quod deus hic sa jus descendit
Preparavit diligentibus se
Lassus es cieulx comme ung tresor muscé
O quam felix l'ame la hault erit
Que videre deum creatorem
Ipsum patrem luminis poterit
Siderumque lune conditorem
Prepotentem cunctorum factorum
Sempiternum solem justicie
Genitoremque sapientie
Frater michi dic supplico tibi
Quantum festum quanta jocunditas
Qualis amor esse potest ibi
Que dulcedo quanta suavitas
Quantus splendor que lux que caritas
Ou on voit dieu lumen in lumine
Dont paradis est tout enluminé
Ibi est lux enluminant le jour
Et perennis vita viventium
Dulcis melos sans fin et sans sejour
Patriaque dux redeuntium
Et corona spes morientium
Morientes pro christi nomine
Qui passus est mortem pro homine
La est honneur decus et dignitas
La est candor lucis estivalis
Vernalisque semper amenitas
Et abundance aussi autompnalis
La est repos sans fin hiemalis
La voit on gloire et chose après mort telle
Qu'oncques ne vit creature mortelle
O doulce vie o vita vitalis
O superna et clara civitas
Ou est vita semper memoralis
Sine morte atque securitas
Et secura semper tranquillitas
Tranquillaque aussi joieuseté
Et jocunda sans fin beneureté
Felix aussi la est eternitas
Eterna lux joie et beatitude
Et beata spes nostri trinitas
Qui nous a fait a sa similitude
Et jectés hors de mort et servitute
Et de chartre infernale et maudite
Pour nous donner la vie dessusdicte
En la quelle benoiste et sainte vie
Perducat nos creator cunctorum
Et après mort soit nostre ame ravie
Inter choros omnium sanctorum
Angelorum et archangelorum
Ou nous puissons voir sans fin sa face
Amen amen amen ainsi se face
Cy finist le mirouer des pecheurs
S'ensuit le second livre nommé l'exortation des mondains tant gens d'eglise que seculiers
Balade pour avoir paix a dieu et au monde Pour contempner toutes richesses et pour amander sa vie
Refrain
Par ce moyen nous aurons tousjours paix
De par le roy de justice assaulx faits
Soubz l'estendart paré d'aversité
De querir armes sont souvent pour les faits
Du peuple enflé et plein d'iniquité
Rempli d'orgueil vuide d'umilité
Dont mainte eglise illustrante et cité
Mise a esté bas arse et desconfite
Et mains vaillans la saison preterite
De glesve occis pourtant chacun s'acquite
Et selon dieu vive desores mais
Destruite ainsi sera guerre mauldite
Par ce moyen nous aurons tousjours paix
Pense ung chacun qu'il portera son faiz
Et qu'après mort sera resuscité
Pour rendre a dieu conte de ses meffais
En jugement ou il sera cité
La luy sera tout son temps recité
La dieu dira aux benoists venite
Et aux maudis ite ceste voix dicte
Chacun aura droit selon son merite
Les mauvais gloire et lyesse infinite
Et les dannés tristesse a tousjours mais
Las pensons y car c'est chose licite
Par ce moyen nous aurons tousjours paix
Prince mortel nostre vie est petite
Et nous suit mort a tout son dart subite
Pourtant faisons des biens plus qu'oncques mais
Tant qu'après mort nostre ame es cieulx habite
Par ce moien nous aurons tousjours paix
Le second chappitre
Balade contre ceulx et principallement gens de court qui ayment ce maleureux monde pour lesser la vie eternelle
Refrain
Homme deffait et a perdition
Las et pour quoi prens tu si grant plaisir
Home abusé plain de presumption.
En ce faulx monde ou n'a que desplaisir.
Envie orgueil guerre et dissention.
Qui maleureuse est ton affection
Que penses tu as tu plus grant envie
De vivre en doubte en ceste courte vie
Qui les mondains a la mort d'enfer maine
Que seurement vivre en vie certaine
Las tu sces bien se tu n'es insensible
Que c'est chose forte voire impossible
D'avoir ça jus ton aise entierement
Et après mort lassus pareillement
Helas pourtant change condition
Et te ravise ou tu es aultrement
Homme deffait et a perdition
Le quel veult tu ou vie ou mort choisir
Choisi des deux tu as discretion
Ayme tu mieulx de ton corps le desir
Pour ton ame mettre a dampnation
Que vivre un peu en tribulation
Et qu'après mort soit ton ame ravie
En gloire es cieulx qui de nul deservie
Estre ne peut en ceste vie humaine
S'il ne laisse terre avoir et demaine
Et pere et mere et tout s'il est possible
Et vivre en paine et en labour terrible
Ensuivant dieu tousjours paciemment
C'est le chemin qui conduit seurement
Après trespas l'omme a salvation
Et qui va aultre il va a dempnement
Homme deffait et a perdition
Cuide tu ci tousjours avoir leisir
D'avoir pardon sans satifation
Et toute nuit en beau lit mol gesir.
Puis asejours sans operation
Passer le jour en delectation
Tant que du tout ta char soit assouvie
Penses tu point qu'il faille qu'on define
Helas oi car mort vendra soudaine
Et prengne fin la plaisance mondaine
Une heure a toi atout son dart horrible
Si tresacop comme chose invisible.
Que pas n'auras lesir aucunement
De dire a dieu peccavi seulement
Ainsi morras tost sans contricion
Dont tu seras par divin jugement.
Homme deffait et a perdition
Homme en peril saiches certainement
Que se tu n'as aultre vouloir briefvement
De t'amender n'autre devotion
Tu te verras ung jour subitement
Homme deffaict et a perdition
Le .iii. chappitre
Balade et exortation a tous prelatz d'eglise pour despriser soy et le monde et mener saincte vie
Refrain
Mais sçais tu quant demain par adventure
Ou aujourd'uy pourtant donne toy garde
Homme mortel creé de terre et fait
Du createur formé a la semblance
Las recongnois le bien que dieu t'a fait
Puis que tu es homme privé d'enfance
Remanbre toy et ayes souvenance
Cueur dur ingrat rempli de vanité
Du hault degré et de la dignité
Ou dieu t'a mis indigne creature
Tant riche et noble eslue en prelature
Dont tu rendras conte estroit quoy qu'il tarde
Mais sçais tu quant demain par adventure
Ou aujourd'ui pourtant donne toy garde
Homme arme toy contre l'eure future
Forte et dure car mort de la pointure
Te picquera de sa cruelle darde
Mais sçais tu quant demain par adventure
Ou aujourd'uy pourtant donne toy garde
Le .iiii. chappitre
Ballade proufitable et utile contenant les principalles joies de paradis et les peines d'enfer
Refrain
Qui tousjours dure et qui jamais ne cesse
Puis qu'ansi est qu'il nous faille fenir
Et après fin conte a dieu de tout rendre
Las desoresmais vueillons nous maintenir
Si saintement sans taiche et sans mesprendre
Qu'a l'eure horrible ou mort nous vouldra prendre
Nostre povre ame a present vicieuse
Soit de vertus tant riche et precieuse
Que voler puisse en la haulte cité
Ou est plaisir joie et felicité
Salut vertus feste et paix pardurable
Vie sans mort beauté santé jeunesse
Le pris povoir et force insuperable
Qui tousjours dure et qui jamais ne cesse
Pourtant vueillons par cueur bien retenir
Tous ces poins cy et a bien faire entendre
Siqu'après mort nous puissons parvenir
Au hault royaume ou nous devons tous tendre
Qui tant riche est que sens ne peut comprendre
La voit on dieu o face glorieuse
La oit on son o voix melodieuse
La ont les corps impassibilité
Agilité clarté subtillité
Et les ames sapience admirable
Puissance honneur sureté et lyesse
Concorde amour et gloire inseparable
Qui tousjours dure et qui jamais ne cesse
Las nous voions tous les jours mort venir
Qui est la fin que nous devons attendre
Et ne sçavons que puent revenir
Les esperis quant les corps sont en cendre
Les bons vont sus les mauvais fault descendre
En une chartre obscure et tenebreuse
Ou est vermine immortelle angoisseuse
Misere ennuy faulte et necessité
Faim soif pleur cri et toute adversité
Horreur fraieur paeur inenarrable
Mort sans mourir desespoir et tristesse
Feu sans lumiere et froit intollerable
Qui tousjours dure et qui jamais ne cesse
O mauvais riche enflé d'iniquité
Rude aux povres las que t'a proufité
Ton riche habit ta plantureuse table
Puis que tu es povre pour ta richesse
Et as soif ore et faim insaciable
Qui tousjours dure et qui jamais ne cesse
Le .v. chappitre
Balade pour aprendre a bien mourir et renuncier du tout au monde
Refrain
Pour bien mourir et vivre longuement
Puis qu'ansi est que la mort soit certaine
Plus qu'autre rien terrible et douloureuse
Et que chose ne peut estre incertaine
Plus qu'en est l'eure horrible en angoisseuse
Et soit si briefve et partant perilleuse
Las nostre joie en ce val miserable
Il m'est advis pour le plus convenable
Que nous devrions du tout entierement
Mettre soubz pié ce monde pou durable
Pour bien mourir et vivre longuement
Delaissier doit toute joie mondaine
Et mener vie humble et religieuse
Qui monter veult a la tressouverainne
Cité des cieulx qui tant est glorieuse
La contempler doit tousjours l'ame eureuse
Qui aime dieu et het euvre de dyable
Suivre les bons estre a tous charitable
Soy confesser souvent devotement
Et messe ouyr qui tant est proufitable
Pour bien mourir et vivre longuement
Trop s'abuse tout homme qui demaine
Orgueil en luy et vie ambicieuse
Quant il sçait bien que la mort tout amaine
Qui vient souvant soubdainne et merveilleuse
Mais doit penser la passion piteuse
Du redempteur et la peine doubtable
D'enfer sans fin qui est inenarrable
Le jour hatif du divin jugement
Et ses pechés comme sage notable
Pour bien mourir et vivre longuement
O mortel homme et ame raisonnable
Se tu ne veulx estre après mort dannable
Tu dois le jour une fois seulement
Penser du moins ta fin abhominable
Pour bien mourir et vivre longuement
Le .vi. chappitre
Balade pour acquerir le tresor des cieulx et despriser toutes richesses terriennes
Refrain
Ou chacun peut sans riens mettre tout prendre
Puis que la chartre obscure de tristesse
Mere de dueil qui joie desherite
Thesauriser ne peut n'avoir richesse
Nul prisonnier qui en sa fosse assiste
Sans charge d'ame et de corps exercite
Et que tout bien terrien se decline
De cueur contrict la majesté divine
Requerons tous qu'après mort aspre et dure
Le beau tresor desploier et destendre
Nous vueille es cieulx qui tousjours sans fin dure
Ou chacun peut sans riens mettre tout prendre
La verrons nous sa face et sa haultesse
En son royaume ou beauté se delicte
La verrons nous la court et la noblesse
De sa mere qui ne peut estre dicte
Des apostres le palays et l'eslite
Et des martirs la sale et gloire fine
Des confesseurs la chappelle tresdigne
Et des vierges le temple et l'amour pure
La nostre cueur doit soupirer et tendre
Pour vivre au lieu de tous biens sans mesure
Ou chacun peut sans riens mettre tout prendre
Qui aujourd'uy regne au monde en jeunesse
Pense en son cueur que sa vie est petite
Et que ces deux maladie et viellesse
Pour le mener droit a la mort subite
Le suivent près et selon son merite
Aura après joie ou dueil sans termine
Pourtant congneu que tout ainsi se fine
Et sommes cy de perdre en adventure
Vivons en dieu si bien qu'après mort rendre
Nous nous puissons des cieulx a l'ouverture
Ou chacun peut sans riens mettre tout prendre
Prince mortel du monde et de nature
Faillent les biens et devenons tous cendre
Pourtant d'avoir paradis mettons cure
Ou chacun peut sans riens mettre tout prendre
Cy finist l'exortation des mondains
Cy c'ensuit le mirouer de dames et damoiselles et l'exemple de tout le sexe femenin
Mirés vous cy dames et damoiselles
Mirés vous cy et regardés ma face
Helas pensés se vous estes bien belles
Comment la mort toute beauté efface
Comment beauté humaine tourne plus a desplaisir après mort qu'elle ne pleut en vie
Je fus jadis tant belle et tant plaisante
Que de beauté j'estoie l'exemplaire
Et ores suis tant laide et desplaisante
Que plus desplais qu'oncques je ne peus plaire
La fin des beaux cheveux et du chief atourné
Las et que sont maintenant devenus
Les beaux cheveux de mon chief atourné
De l'orde terre estoient tous venus
Et en terre s'en est tout retourné
La fin des beaulx ieulx
Las comment sont mes beaux ieulx vers changés
Et de ma face aussi tout le surplus
Las tellement les ont les vers mangés
Qu'on n'i voit plus que les partus sans plus
La fin de la beauté de la face
Las advisés hors ma face et dedans
Qui jadis fut tant belle et coulouree
Laissé n'i ont le vers fors que les dens
Las bien peu m'est ma beauté demouree
La fin du beau col
Las je souloie aussi droit q'une tour
Avoir le col plus blanc que lis et beau
Environné d'ung collier d'or autour
Et maintenant plus noir est q'ung corbeau
La fin de la beauté de la poitrine
Las maintenant qu'est aussi devenue
Ma poitrine tant blanche et tant refaite
Las qui la voit maintenant toute nue
Horreur en a tant est laide et deffaite
La fin de la beauté des mains et des piés
Las et ou est la beauté de mes mains
Aornees de diamens richement
Las et ou sont pour denser soirs et mains
Mes piés polis chaussés mignotement
La fin de la beauté du corps
Las ors souloit mon corps estre tenu
Tant bel et gent et souefment nourri
Et maintenant qui l'advise tout nu
Conte n'en fait ne que d'un sac pourri
La fin des precieux vestemens
Las de draps d'or de damas et de soye
Jadis souloie estre toute couverte
Et maintenant fault que d'une serqueul soie
Envelopee et demi descouverte
La fin des riches fourreures
Las je souloie estre jadis d'ermines
Toute fourree et de fins menus vers
Et maintenant je porte les vermines
Et me rongent les gros et menus vers
La fin des sumptueux edifices
Las je souloie avoir mes beaulx logis
En hauls palais chambres et lis parfons
Et en ung coffre a present desclos gis
Desoubz la terre ou les vers sont au fons
La fin du demainne terres possessions et revenues
Las je souloie avoir si grant demainne
Possessions terre et revenue
Et ores suis par mort qui tout amainne
Tant miserable et povre devenue
Ci s'ensuit du grant renom et de la domination
Las j'avoye du temps que j'estois vive
Si grant renom et domination
Et maintenant si petit n'est qui vive
Qui n'ait de moy abhomination
Des biens de fortune qui ne durent rien
Las fortune jadis tant me prisa
Que des prisés estoie en tout prisee
Et par la mort qui tout mon pris prins a
Des desprisés suis ore desprisee
Comment les plus belles sont après mort finees
Las près de moy jadis on se tenoit
Et maintenant chacun de moy s'eslongne
Ma grant beaulté chacun veoir venoit
Et on me fuit comme une orde charongne
Bon exemple de la mort qu'on deviendra
Las remirez qu'après respas serés
Ne plus ne moins mon fait le vous figure
Et recordés que vous trespasserez
Et porterés comme moy la figure
Comment beauté devient horrible après mort
Las tant belle m'avoit faicte nature
Que ma beauté les cueurs des beaulx perçoit
Et ores n'est si laide creature.
Qu'il n'est horreur si tost qu'il m'apersoit
Comment beauté fault acoup
Or est toute ceste beauté passee
Plus tost que vent en ainsi peu d'espace
Et tout acoup suis jeune trespassee
Et perdue se dieu ne me fait grace
Comment par beauté on pert souvent l'ame
Las de beauté que j'ay peu nommer ci
Que perdue ai ne du corps soubz la lame
Ne me chault ja se dieu me fait merci
Si que sans fin n'en soit perdue l'ame
Comment pour gloire terrienne on pert la gloire eternelle pour estre danné
Mais c'est pitié quant pour joie si briefve
On pert des cieulx la gloire en ung moment
Pour estre en dueil tousjours dont plus en griefve
Ung jour que si deux cens jours de tourment
Comment honneur plaisance et estat mondain faillent acoup
Que vault honneur doncques qui tant peu dure
Que vault estat qui si tost devient cendre
Que vault plaisance en corps si plain d'ordure
Que vault monter pour si tost bas descendre
Comment il fault rendre conte de tout après mort
Que vault pompe ne bruit qui si tost fault
Las mieulx vauldroit le moien estat prendre
Puis qu'on sçait bien qu'en la fin il en fault
Tresestroit conte au juste juge rendre
La fin des plus belles du viel testament
Las et ou sont celles qui piessa furent
Dont les beautés raconte mainte histoire
Judich hester qui tant grant beauté eurent
Dont mention fait la bible et memoire
La fin de la beauté des plus belles de jadis
Las et ou sont de helaine et lucresse
Les grans beautés et de sidoine aussi
Faillies sont et mortes en destresses
Passé long temps et vous mourrés aussi
Comment domination dure peu et est tost oubliee. après mort
On me souloit nommer maistresse et dame
Et plaisir faire et service jadis
Et maintenant je ne saiche au monde ame
Qui dist pour moi ung seul de profundis
Conclusion qu'on doit si bien vivre sur terre qu'on puisse acquerir vie eternelle es cieulx
Helas pourtant vous qui regnés sur terre
Dont après mort on ne fera plus conte
Vivés si bien devant qu'on vous enterre
Qu'après mort vifs dieu en sa court vous conte
Cy finist l'exemple des dames et damoiselles et de tout le sexe femenin