EURIMEDON
OU
L'ILLUSTRE PIRATE
TRAGI-COMEDIE.
Par le Sieur DESFONTAINES.
PARIS, Chez Anthoine de Sommaville,
au Palais, dans la petite Sale, à l'Escu de France.
M. DC. XXXVII.
Avec Privilege du Roy.
EPITRE
À
MADAMOISELLE
DE VERTU
MADAMOISELLE,
Voicy des Estrangers qui viennent des extremitez de la Grece, & qui attirez par la reputation de vos merites, souhaittent de s'acquitter des hommages qu'on doit à vostre vertu. Si vous daignez prester l'oreille au recit de leurs advantures, vous ne les estimerez pas indignes de vostre entretien; & je m'asseure que vous leur ferez un favorable accueil quand vous sçaurez qu'ils sont Princes, & que par des actions qui ne degenerent point de leur naissance, ils vous auront faict voir dans le Tableau de leur vie, les Images de tant de Heros que vostre Illustre Maison a donnez à la France. Je parlerois de vos augustes devanciers, François, Odet, & Charles de Bretaigne qui sortis des anciens Ducs de cette belle Province, se sont monstrez dignes surgeons d'une tyge si glorieuse, & en ont conservé la gloire dans vostre famille, qui en porte encore des marques aussi durables, que celebres; Je parlerois des notables services qu'ils ont rendus à l'Estat par les effets de leur fidelité, & de leur courage, si ce n'estoit publier des choses qui ne sont incognues qu'aux barbares, & vouloir comprendre dans une lettre ce qui merite des volumes entiers; Je diray seulement que ces deux grands Roys Charles huict & Louys douze ont honnoré vos ancestres du glorieux tiltre de frere, & qu'en mille occasions ils ont confirmé cette qualité advantageuse qu'Anne de Bretaigne, digne Espouse de ces deux Monarques leur avoit legitimement acquise. Cette consideration (Madamoiselle) & celle de vostre merite particulier ont faict resoudre deux Roys de venir aussi vous rendre les honneurs que vos Ayeulx ont autrefois receus, & admirer en vous une Majesté qui leur faisant oublier la leur, les force d'advouer que vous seriez incomparable, si le Ciel ne vous avoit donné une soeur qui partage avecque vous les inclinations de tout le monde. La Renommée qui a remply l'Univers de cette verité, a donné de la jalousie aux plus belles de vostre sexe, & de l'admiration aux plus parfaites, mais vous donnerez de l'estonnement à nostre Eurimedon & à sa Pasithée, quand vous leur ferez cognoistre que la beauté, & la gentillesse des Dames de France emportent le prix sur celles de Grece, & de toutes les nations de la Terre; Aussi n'est-ce pas leur dessein de vous disputer cet advantage, mais seulement d'avoir l'honneur de vous entretenir, afin qu'après cette faveur ils puissent estre les Paranymphes de vos merveilles, par la voix de celuy qui a pris la hardiesse de vous les presenter; & qui desire estre toute sa vie,
MADAMOISELLE,
De vostre Grandeur.
Le très-humble & très-obeissant serviteur
DESFONTAINES.
À
MADAMOISELLE
DE VERTU.
SONNET.
Beauté par qui Venus void la sienne effacée
Mes vers pour te louer ont trop peu d'ornemens,
Et je crains, te faisant ces foibles complimens
Que ta rare vertu n'en soit interessée.
Ta gloire ne sçauroit estre plus rabaissée
Qu'alors que le commun en a des sentimens,
Ont doit à tes attraits les plus beaux mouvemens
D'une ame que le Ciel ayt tousjours caressée:
Pardonne toutesfois à ma temerité
Si j'ose descouvrir à la posterité
Ce qui te faict paroistre avec tant d'advantage;
Qu'on sçache que par toy le vice est abbattu
Et que tes actions mieux qu'un noble heritage
Te donnent aujourd'huy le beau nom de VERTU.
DESFONTAINE
AU LECTEUR.
Lecteur je croirois offencer ton jugement si je ne le croyois capable de discerner les fautes qui se sont glissées en l'Impression de cet ouvrage, & je ferois tort à ta courtoisie si je ne croyois que tu les excuseras; c'est pourquoy sans m'arrester à t'en faire le denombrement, je te supplieray seulement de remarquer qu'en deux ou trois endroits où tu verras que les vers manqueront en leurs mesures, la faute vient de ce que l'Imprimeur a escrit doncque pour doncq, encore au lieu d'encor, & une fois avec, au lieu d'avecque pour le reste je le laisse à ta discretion.
LES ACTEURS.
ARCHELAS, Roy de la Troade pere de Pasithée.
MELINTE, Roy de Thessalie & frere d'Eurimedon.
EURIMEDON, Amant de Pasithée.
TYGRANE, Prince d'Armenie & Rival d'Eurimedon.
FALANTE, Escuyer d'Archelas.
LYSANOR, Escuyer d'Eurimedon.
PASITHEE, Infante de la Troade.
CELIANE, Princesse d'Armenie, & Amante de Tygrane.
ALERINE, Suivante de Pasithée.
ARGAMOR, Page de Tygrane.
La Scene est en l'Isle de Lesbos.