DIOCLETIAN.
Quoy donc, vostre devoir consiste à me desplaire?
À promettre une chose, & tenir le contraire?
À venir suborner un sujet à mes yeux,
Et le forcer enfin d'abandonner nos Dieux?
Vous appellez peut estre une telle impudence
Un divertissement, un jeu plein d'innocence?
Mais croyez si ce traict se passe impunément
Que je suis sans memoire & sans ressentiment:
Non, non, perfides, non; apres un tel outrage
Ne vous figurez pas que je sois sans courage;
Ainsi que vostre sort vostre crime vous joint,
Qu'un destin different ne vous separe point,
Vous avez mesme but & mesme intelligence,
Et vous esprouverez une mesme vengeance.
ARISTIDE.
Cesar, au nom des Dieux, escoute moy parler,
Voy quels sont les objets que tu veux immoler;
Si ton juste courroux demande des victimes,
Prends garde pour le moins qu'elles soient legitimes,
Et qu'un injuste arrest aussi prompt que cruel,
Ne perde l'innocent avec le criminel.