DIOCLETIAN.
Si tu repugnes tant aux abus des Chrestiens,
Fay nous voir des effets du discours que tu tiens,
Va t'en trouver Genest, & t'efforce d'abattre,
Par de vives raisons ce coeur opiniatre.
L'adresse de l'esprit jointe aux graces du corps,
Faict ordinairement d'admirables efforts:
Employe un peu tes yeux au secours de ta bouche,
Il n'est point de mutins qu'un bel objet ne touche;
Desja mon courroux cesse, & cede à tes attraits,
Fay que Genest encor en ressente les traits,
Et que son coeur vaincu par de si belles armes,
Nous rende redevable au pouvoir de tes charmes.
LUCIANE.
Je suis preste, ô Cesar! de suivre aveuglément,
Et tes intentions, & ton commandement,
Bien que je ne sois pas assez presomptueuse
Pour en ozer attendre une fin glorieuse:
Pourtant, puis qu'il te plaist, je ne m'en deffends pas,
Et j'emploiray l'adresse au deffaut des appas:
Mais enfin souvien toy, Seigneur, que Pamphilie,
A sur luy dez long-temps sa puissance establie,
Et que l'heureux effort de ce coup glorieux,
Appartient à sa langue aussi bien qu'à ses yeux.