SCENE VII.
AMINTAS, ELISE, OROSMANE.
Amintas.
J'ay fait tout ce que j'ay pû faire,
Mais les Gardes doublez par l'ordre de mon Pere
Que de l'humeur qu'il est je ne sçaurois changer,
Laissent mon ame en peine, & ta vie en danger;
mais où la force est foible, employons-y l'adresse;
Sous mes habits connus sors avec la Princesse,
Si l'entreprise manque, au mépris de la mort,
Je briseray tes fers par un dernier effort.
Licas que j'ay gagné, mon dessein favorise:
A quoy donc se resout l'heureux Amant d'Elise;
Elise.
Nous suivrons ton conseil, ô Prince genereux!
Prince que malgré moy j'ay rendu malheureux.
Amintas.
Ce Prince malheureux, & qui vous importune,
Ne se prend qu'à luy seul de sa longue infortune.
Allons changer d'habits où Licas nous attend,
Viens-tu donc?
Orosmane.
Je te suis; n'espere pas pourtant,
Qu'en me tirant des fers de ton injuste Pere,
J'en sois moins ton Rival, ton cruel adversaire.
Tant qu'Elise vivra sous vos indignes loix;
Que vous luy ravirez la liberté du choix,
Orosmane & les siens periront pour Elise.
Paphos suivra de pres Amatonte surprise.
Et ne me blasme plus de mes hostilitez,
On manque pour Elise à des formalitez;
Pour mériter Elise, on peut, on doit tout faire.
Amintas.
C'est par cette raison, vaillant Prince, ou Corsaire,
Puis qu'on doit tout oser pour un bien d'un tel prix,
Que je veux achever le dessein que j'ay pris.
Fin du quatriéme Acte.