du Sieur de Champlain Capitaine
pour le Roy en la Marine.
Veux tu Voyageur hazardeux
Vers Canada tenter fortune?
Veux tu sur les flots escumeux
Recevoir l'ordre de Neptune?
Bien équipé fay chois soudain
D'un temps propice à ton dessain,
Et tu verras qu'en son empire
Le vent plus violent & fort
Pressant les flancs de ton navire
Te fera tost surgir au port.
Que si le Pilote est mal duict
Aux routes qu'il luy convient suivre
Il pourra estre mieux conduict
S'il se gouverne par le Livre
Qu'en sa faveur a fait Champlain,
A qui les Grâces ont à plain
Prodigué tout leur heritage:
De qui Pithon a prins le soing
D'orner son élégant langage,
Afin qu'il t'aide à ton besoing.
Va donc Pilote sans frayeur
Ancrer en la Nouvelle France;
Ne crain de Thetis la fureur
Ny des Autans la violence:
Champlain comme s'il estoit fils,
Ou de Neptune, ou de Typhys
Rendra ta nef si asseurée,
Que ny les monstres de la mer,
Ny tous les efforts de Borée
Ne la pourront faire abysmer.
Que si quelqu'un par vanité
Estime avoir cet advantage
De porter quelque Déité
Et ne pouvoir faire naufrage,
Reproche luy qu'en ce qu'il croit
Tu es fondé en meilleur droict,
Si la raison trouve en toy place;
Car deferant aux bons advis
DIEU favorise de sa grâce
Ceux qui tousjours les ont suivis.
PIERRE TRICHET
Advocat Bourdelois.