VII. RENARS CONTREFAIS
(Ved. vol. II, pag. [81]).
Virgille plus fu sapïens,
Plus clerc, plus sage et plus scïens
Que nul qui a son temps vesquist,
Et plus de grans merveilles fist.
Pour voir il fist de grans merveilles;
Homs naturel ne fist pareilles:
Et si fut il bien dechéu
Cil qui fut tant sage scèu.
Ung peu de son sens vous diray,
Et puis apres je vous liray
Comment dechut fu sans fausser,
Tout par deffault de bien gloser
Combien qu'il fu(s)t de gran sens duits.
Il fist de Naples les conduits:
Parsouls terre de pierre estoient,
Qui vin grec a Romme livroient;
De dix journeés la venoit
Par les conduits que fait avoit.
Il fist un pont sur la riviere,
Que ad ce temps si sage n'yere
Qui sceust de quoy fait il estoit
Ne d'ont le fondement venoit,
Et comment la pierre on y mist.
Cil une mouche d'arain fist
Que toutes mouches qui estoient
Celle approchïer ne povoient
D'un jet d'une pierre tenant,
Qu'el'(ne) morusse(nt) maintenant.
Il refist ung cheval d'arain,
Que tout cheval plain de mehain,
Tantost que ce cheval véoient,
De ce mehaing se garissoient.
Enmy Romme ung miroir fist,
Et tout enmy Romme le mist,
Que tous ceulx qui le regardoient
D'une journeë voir povoient
Toute humaine créature
Qui avoit volenté ou cure
De Romme nuire ou grever:
La le porrent v(o)ir et trouver.
Illec(ques) véoit qui venoit
(A) Romme, ou qui nuire y vouloit.
Mainte grant chose faire osa:
Or oyer comment mal glosa.
A une dame du pays
Fut il par grant amour bays,
Et a grant merveilles l'ama
Et son coeur en elle sema:
Pluseurs fois en veille et en pense,
Tant qu'il en pert la contenance.
Ceste dame est de grant atour,
Et demouroit en une tour
Qui fut plus haute de dix lances.
Cil qui la mist ses contenances
Lui tramist une mesagiere
Qui de s'amour lui fist prïere,
Qué elle le voulsist amer
Et de fait son amy clamer;
Et, se elle vouloit richesses,
Terrïennetes et noblesses,
Tant lui donroit a dire voir
Qué elle en voulroit avoir.
Celle qui eust le coeur faintif,
Qui eust au coeur moult de despit,
Et lui manda par malvais tour
Qué elle bien volloit s'amour
Et que sa voulente feroit
Et que de coeur bien l'ameroit,
Mais ne pooit a lui aller;
Mais s'il se volloit tant pener
Et que trop il ne lui anuit,
Tantost quant viendra a minuit
Qu'il veinst au pië de la tour,
La metteroit a point son atour;
Une corbeille descendroit,
Et Virgille ens se metteroit,
Et amont tantost vous trairons;
S'il vous plaist, ainsi le ferons:
A tirer ne faulrons nous mie,
Ainsi l'ordonne vostre amie.
Cil ne pensa ne ne glosa,
Tant a celle dame pensa;
A la tour est la nuit venus.
Illecques s'est tous quois tenus,
Et tant se vault illec tenir
Qu'il vit la corbeille venir,
Et cil s'est tost dedens bouté:
Adont fut il amont tiré.
Quant au droit millieu fut saquie,
Adont illec fut atacquie
Qu'il ne pot monter n'avaller:
Or poeult illec des mains voller,
Et illecques lyës se tint
Jusques par tout le beau jour vint.
Tout le monde y est venu
Et chascun s'est illec tenu;
Disoiënt: Vez cy grant merveille;
Véez Virgille en la corbeille.
Virgille qui tant ot savoir,
Pot illecques grant honte avoir:
Toute Romme y acourut;
A tout chascun cecy parut,
Et quant le mydi fu allé
Adonc fu de corde avallé...
Quant Virgille fut avalé,
De son meschief fut demalé
Et de honte qu'il pot avoir;
Lors prisa moult peu son savoir
Et dit: Jamais ne sara chier
Se de ce ne se poeut vengier.
Et lors mist sa scïence en coche,
Comme a la chose qui lui touche.
Il y a pensé et dité:
Lors fist qu'en toute la cité,
De dix lïeueës tout a point,
Il ne demoura de feu point;
Tout fust estaint sans detrïer.
Lors fist par ung varlet crïer:
Qui du feu voulroit acquerir,
Le voit a tel dame querir;
Entre ses jambes en ara,
Né ailleurs n'en recouvera.
Nul ne sceust ailleurs feu trouver:
Qui dont véyst la gent ouvrer;
Tantost fu celle tour brisee
Et celle grant dame escoursee;
Droit enmy la ville fu mise
Et en ung hault lieu fu assise.
Illec chascun son... tenoit,
Et chascun du feu y prenoit;
A son... chandeilles metoient,
Et a son... les alumoient,
Et cil qui alumé avoit
A aultrui aidier n'en pooit.
Il n'en pooit aidier nullui,
N'en avoit mestier que a lui.
Celle fu illec ordonnee
Tout le jour, de la matinee.
Jusques il fust la nuit obscure,
Toute nuë sans couverture,
Toutes jour chandeilles boutoient
Et toute jour les y alumoient.
VIII. LI ROUMANS DE VESPASIEN[336]
(MS. TORINESE)
(Ved. vol. II, pag. [97]).
A Roume fu Noirons li arabis
(mancano undici versi)
....ssement li fist Noirons merir,
Quant il le fist si faitement morir;
Mes c'est vretes on le trueve en escrist:
Qui mauvais sert maus gueredons i gist.
Quant ot ce fait li felons arabis
Il a fait faire un tel palais votis
Tout d'escharboncles ainsi safirs petis;
Li morcier fu de fin or esclarci.
Quant li palais fu fais et bien polis,
Ainsi reluist con solaus esclarcist;
Vergile apelle son mestre, si li dist:
Mestres, dist il, entendes envers mi,
Pour le grant sens que Dex a en toi mis,
Me lieve jou ades en contre ti;
Car le conseil ses tout de paradis.
Et jou d'emfer, car g'i ai des amis
Or me di, mestres, garde n'i ait menti.
Combien durra mes grans palais votis
Qu'il n'a si bel tant con chieus puet couvrir,
N'est hons el monde c'achater le peuist.
Et dist Vergiles: il durra trop petit.
Et dist Vergiles: vos palais tant durra
Que une verge pucelle enfant aura.
Lors le perdres en habisme cherra;
Ne ja puis ame en enfer n'entenra,
Duch'a ce jour que chieus qui tout crea
Au grant juisse son jugement tenra;
Encore ne sai ge se nus i entenra.
Et dist Noirons: grant piece duera,
Che ne puet estre, ne ja chou n'avenra
Que une verge pucelle enfant aura.
Et dist Vergiles: par ma foi si aura;
Et s'ensi n'est, trop mallement nos va.
Or entendes li grant et li petit
Si ores ja chancon de grinour pris
C'oisies onques tres que le tans David;
Coument li siecles fu en IIIJ partis
Com furent fait moustier et cruchefis
Saintes eglises et crois sus les chemins,
XXX. ans apre que Vergile ot ce dit,
Que damel dex en la virge se mist,
Perdi li rois son grant palais votis
Si que la terre reclot pardesus lui.
Dolans en fu li felons arabis;
Son maistre apelle maintenant si li dist:
Fis a putain, fel treitres mastins,
L'avenement savies bien Jhesu Crist,
Sachies de voir se le m'euissies dit
Je n'eusse mie si grant oevre asouvit
Voes tu donc dire, ne penses tu ensi,
Que Dex rait ja sa gent ne ses amis
Que nous avons par dedens enfer mis
V. M. ans a peu pres acomplis?
Nes puet rauoir que g'i ai garde pris,
Se pour jaus nest ses cors en present mis,
Et se vos Dex estoit mors ne ocis
Pour rachater ses gens et ses amis,
Coument porroit en vie revenir?
Se tu le ses, bons clers, si le me di;
Se tu nel fais, t'aras le chief parti.
Ce dist Vergiles: Noiron or m'entendes;
Dex rara bien ce que saisi aves
Et tout par droit, si le vous voel moustrer.
Vou saves bien de fine verite
Quant Dex ot fait Adam, le premier fe
Dont tous li mondes est partis et sevres;
Ne peut il mie ne venir ne aler
Oir, sentir ne veoir ne parler
Tres qu'il li eut en son cors alene,
Et tint sa bouche close em poeste,
Tant que le pris de la grant maieste
Li fu au cors atachies et fermes,
Coumanda lui le cors a gouverner
Qu'il le fesist et venir et aler
Oir, sentir et veoir et parler.
Quant peut chou faire de la grant maieste
Le roi des chieus fu dont fis apelles
Adans nos peres, dont nous sons tout jete,
Encore en puet Dex faire .I. trestout tel
De lui meismes, li grans de maieste,
Comme il ot ou cors Adam boute
Dont tous li peulles est partis et sevres
En une verge le puet faire aombrer,
Et penre vie, sane et charnalite,
Et peut par terre et venir et aler,
Et peut .I. honme confundre et sourmonter,
Puis puet morir celle charnalite
Pour nos armes ravoir et rachater
Que vos volles ens en enfer mener.
Mes li sains esperis dont vous m'oes parler
S'en puet lasus em paradis raler,
Avoec son pere, le grant de maieste,
Com li solaus resache sa clarte,
Et com les iaues entrent toutes en mer.
Ja n'en sera ne ocis ne tues,
Et s'en seront tout afait rachate.
Et dist Noirons: tu as dit verite;
Car en tel guise l'avoie jou pense,
Et ensi puet et venir et aler,
Et descendre et es chieus remonter,
Et ses amis ravoir et racheter.
Mes se li abres, par coi fumes dampne
Eust eut ame et vie com aves,
Ja pour tel chose ne fussies rachete;
O le fil dieu convenist demorer,
Et cors et ame tous en enfer aler,
Ou tous fussies perdu sans recouvrer.
Or te tien coi, je voel a toi parler
De loi contre autre voel a toi estriver;
Qui ert vaincus le chief ara cope. —
L'espee prent si l'aficha oupre.
Et dist Vergiles: .I. respit me dounes,
Tant que jou aie a Ypocras parle
Et a Florent et au boin conte Yde,
Et a Jehan, qui dou Latran est nes,
A Bonnifasse, mon oncle le sene,
Et Musicle, ma serour au vis cler,
Qui a le son des grans cloches trouve.
Et dist Noirons: faites, si vos hastes.
Et dist Vergilles: sire, ja me rares.
Ou cheval monte s'entra a la cite
Dusc a majour ne se vot arester.
Tout son lignage a Vergile asamble:
Signour, dist il, nous sons tout vergonde
Chis empereres c'avons tant hounere,
Est anemis, il le m'a bien moustre
A par .I. peu que il ne m'a tue
De loi contre autre doit a lui estriver.
Conselies moi ou plus ne me verres.
Ipocras l'ot, le sens cuide derver;
En son milleur livre a regarde
Les haus nons trueve Jhesu de maieste
Et sa grans force et sa grans dinite.
Il les trait hors, si les a embrieves,
Vient a Virgile, es dens li a glues;
Pui li a dit: biaus fis, tu es armes
N'est riens el monde qui te puisse griver;
Va t'ent ariere au diable estriver;
Se tu le vains si ait le chief cope.
Et puis ferons son enfant bien garder
De par sa mere et nos amis carnes.
Et chieus respont: peres, a vostre gre.
Ou cheval monte, sest ariere tornes.
Enpre Noirons est maintenant entres
Voille li rois sest contre lui leves.
Maistre, dist il li, soies mau trouves
Car t'as tel chose avoec toi aporte
Dont je seroi honnis et vergondes.
Or te voel dire la pure verite
De vostre Dex coument il a ouvre.
LX. M. ans et plus asses
Que ne poroie dusqua M. ans nombrer
Et encor plus que nauroit li celers
Que n'ait de gouttes d'iaue dedens la mer,
Fu vostres Dex, li rois de maieste,
En lui meismes et en sa dignite
Et en sa force et en sa poeste,
La sus eschiel en grant maieste,
Avoec ses angles, que je ne sai noumer,
Qui cherubins sont d'aucuns apelles
Et seraphin, ce sai par verite,
Ainsi qu' il vosist nulle chose former
Une cure fu de cest siecles apenses.
Lors deronpi les tenebres de mer
De sus turmie s'en vient dont reposer
Une gran roche qui stet de sus la mer,
Li aiemans est par non apelles,
La fist Michiel, .I. angle en pene,
Et puis Abel et puis mon parente,
Puis en fist tant en celle maieste;
Car en la roche ne poiens retourner,
La sus el chiel si lor presta oster
Avoec les angles que je ne sais noumer.
Puis retourna vostre Dex en la mer,
De sus la roche de viel antiquite,
La fist infer qui tout voet engouller,
La serpentine toute jeta en mer
Et l'ordeure quan qu'il en puet trouver.
Et lors crea les poissons pour noer,
Fist la serainne, le sturjon de son gre
Et maint autre que je ne sai noumer.
Mais quant il vot en paradis entrer
Lussiabiaus si li vot deneer,
.I. mauvais angles qui fu fais en la mer
Et vot Dex estre et contre lui aler
Maint felon angle fist au fait acorder
J'en suis li .I. si men doit mult peser.
Ain quans par force Dex ne nos vot grever,
Par jugement nous vot trestous mater;
Adont nos fist en abisme entrer
Et en enfier nous fist trestous verser;
M. ans i sumes acomplis et passes.
Puis retourna vos Dex a nous parler,
Si me manda moi et mon parente.
Grant joie eumes en enfer par vrete;
Car nous cuidiens bien la pais recovrer
Et par sa grase emparadis entrer;
Et il nos vot plus tranciller asses.
Coumanda nous la terre a trouver;
Ain quans pour lui n'i vosimes aler,
Car plus de mal ne poiens endurer
Tres qu'il nous eut baguingnies et loe.
Il nous pourmist .I. bel pumier rame
Quant il aroit de la terre a son gre
Et il aroit les ylles enmelles
De sa grant grase et de sa dignite.
Lors nous plungaumes plus de C. M. en mer,
.I. si grant tro feismes en la mer
C'on i poroit mucer XXX. contes.
De Sathanie est li goufre apelles.
De XXX. lieues que de lonc que de le
Ne la protroit barge, dromons, ne nes
Ne gogne nulle ne nus bargiaus ferres,
Ne fust pardue sans jamais recouvrer;
Car nous cuidiens tout le siecle effondrer,
Le fiermament abatre et verser.
Cheus ons nous fait quant Dex nos fis cesser.
Lors prist l'iaue tantost a avaler
Et ens ou goufre par tel forche a entrer
Comme .I. quariaus quant on le lait aler;
Si parut terre en mult de lieus par mer
Quil nest nus hons qui le peut nonbrer.
Et Dex sour terre si prist a labourer,
Si fist mainte herbe et maint abre rame
Et mainte beste et maint oisel voler,
Paradis fist qu'e terrestre clames
D'escharboucles est li vergies fermes,
Qui plus reluisent que solaus en este
Li mur per haut quan c'om puet regarder.
Entour les murs a .I. mult grant fosse,
Qui purgatoire est par non apelles,
M. ans apres quant Dex fu pourpenses
Fourma Adam et Evain autrestel
Dont estes tout et parti et sevre;
Si lor livra en tel vergier ostel
Tout quanqu'il virent lor fu abandonne,
Fors le pumier qu'il nous avoit donne.
Ils en mangierent et nous furent livre.
Et la lignie que dials s'ert puis sevre
Ravoir les voet, nos anemis mortes,
Qu'en la verge est de nouvel aombres.
Et quant je vi la fine verite,
Que tous li mondes nos fu quite clames,
G'issi d'infer jou et Esgarines
Babiaus, .I. autres li angles foursenes;
Adont fesimes Babilone funder,
Une cite outre la rouge mer,
XXV. lieues d'achainte a la cite
Et XX. portes e XX. ponts leves,
Et la ens croist et pains et vins et bles;
Dedens XX. ans ne seroit afames
Tous li gens puelles qui est en la cite.
Et la gran tour nos feimes lever,
La tour Babel, en ois tu parler,
Quantois c'on soit au daerains degre
XXX. C. M. i poroit ont conter
VIJ. lieues d'ombre peut bien la tour durer.
Que nous volimes a damel dex aler
Qui le quidiens guerroiier et grever,
Mes dames dex nelvot mie endurer.
La tour rompi .I. soir a la vesprer.
Li rois Babiaus la cuida recombler;
Mes vostres Dex nel vot mie endurer,
Que li langage si furent la mue.
Li uns a l'autre ne sot onques parler.
Quant demandoient le mortier destempre,
Ou la pierre dont devoit machonner
On lor portoit a boire et a disner.
Adont cuida li rois Esgarines
Que li ouvrier d'Inde l'eussent gabe
Tous maintenant ster bani dou regne;
Et si le mist dedens nonnante nes,
Fames, enfans lor fist oans mener,
Si lor donna et farines et bles
Pourpens compas et gens pour aus garder
Aviaisons faire et fours a mouliner;
Et il s'esparsent par les yles de mer,
Si sunt jeant, sarrazin et escler.
Adont prist fame li rois Esgarines
Li rois Babiaus et l'autres malhaines;
IX. fiex en orent dont Mahons est l'ainnes.
Par Mahonmet qu'est de nos parente
Nous est dou monde IIJ. pars delivre
Paiens, juis, sarrazin et escler,
Turc et anfage et indois doutre mer
Seront tout nostre, n'en puet arier aler,
Li rois des chieus quant si nos voet grever
Qui de la verge est noviel aombres.
Et quant je vi la fine verite
Tous mes lignages s'est fors moi bien prouves;
Et je fis Ronme et faire et funder
Et si fis faire .I. palais liste
Tout d'escharbondes et d'or fin esmeres.
Tolut le m'a en abisme est entres.
Vien si me trenche le chief sans demorer,
Je ne puis plus sus terre demorer,
Ains me convient en enfer retourner,
Pour les portes et tenir et garder
En contre Dex que il nous voet grever.
Jou ai .I. fil, Floriens est noumes,
Je le clainc quicte le roi de maieste.
Et dist Vergilles: merveilles me contes;
Ne place a Dex que vous ramenteves
Que de par moi soies mors ne tues,
Se ne vous puis par jugement mater.
Sire Noiron, dist Vergille dausit
Se vous fustes banis de paradis
C'est a bons drois, si le vous dirai chi,
On ne doit mie garder son anemi,
C'est verites nous l'avons en escrit,
Que Moyses, sachies, le nous y mist.
Quant Adans fu banis de paradis,
Dou bon roiaume ou damel diex l'ot mis
Et il sen vient el mont de Sineis,
Ne cuidies mie, il fu mult abaubis.
II. C. ans fu sans Evain la gentis,
Ains ne degna retourner envers lui.
Souvent li dist: ne t'es maier amis,
Pour toi m'estuet mult gent paien soufrer.
Adonques jut Adams avoecques li,
Si engenra VIJ. enfanchons petis
Les IIIJ. filles et li IIJ. furent fil
Li .I. Abiaus et li autres Chains
L'autres fut Sept, si fu li plus gentis.
Quant li prumier enfanchons furent ne etc.
fol. 82 (ved. vol. II, p. [99])
Et Mahons a l'aneme conjure,
Che fu Noirons qui tant le sieut amer.
Il vint a lui, puis dist: mes que voles?
Et dit Mahons: je suis pour vous ires;
Rois deussies estre, servi et honneres,
Et deussiez Roumenie garder;
Mes par Virgille eustes le chief cope.