Albrecht Heugel in die mül bey den fleischpencken.
Lienhart Rewtheymer in des Grolands mül.
Linhart Stromeir in die newen mül in sant Laurentzen pfarr.
Hanns Slüsselvelder in die newen mül an sant Sebolts pfarre.
[7b] Und wenn fewer aufgeet, so süllen sich alle soldner onvertziehen geharnascht und geritten zu dem soldnermeister fügen und mitsampt im auf den marckt reyten zu dem schönprunnen und da halten, ob ir die burgermeister bedorften, das sie des gehorsam wern.
Und so es prynnt, so sol ein soldnermeister von stat an vier soldner senden zu dem fewer an ein ende, da sie nicht irren noch hindern, zu halten, ob man ir zu potschaft werben oder anderen sachen bedorft, das sie des gehorsam und willig seyen.
Er sol es auch dem hauptman auf der vesten von stat an empieten.
Es sol auch der soldnermeister zu yedem der stat tor, türlein und auch swynbogen zwen soldner schicken, die dabey halten, und ob sie ichts vernemen das not tett, das denn der ein soldner das dem soldnermeister von stundan zu wissen tett auf dem Marckt und der ander so lang dabey halten belib, biß er abgevordert wirt.
Der soldnermeister sol auch, so es bey nacht prynnt, wiewol ein fewer erlescht ist, bestellen, das ettlich soldner hie dißeyt und ettlich soldner enhalb in der stat die nacht umbreyten biß an den tag, und ob die icht geverlichs vernemen, das sie dem soldnermeister das onvertziehen zu wissen tetten.