Scene I.— Brownschweiger’s sitting room. Enter Yokle and Henner Hoffman.
Henner. Es mus eppes gadu sei. Du bazawlsht mer yo ken interessa may und es sayd shlecht ous.
Yokle. Well, hob yusht noch a wennig gadult, und ferrup mich net. Ich expect es gait bol besser—
Henner. So husht du shon long gsaut. Won’s net ware os dy frau, dee Frany, alendig ware, don het ich net so long g’wart.
Yokle. Wart noch a wile. Ich bin sure os es all recht wert eb long.
Henner. Won es noch ware os wee’s for yora zurick wor ep dos dee ferdulta fry shoola und may machina und oll dee socha in der gong komma sin, und du hetsht besser g’shpawrt—ovver ich will der noch 4 wocha zeit gevva. Ich mus ovver gay. ( Exit. )
Yokle. ( Alone. ) Won ich yusht seller Shwinefelt nee gsana het. Ich hob shon bol $800 in dee inshurance co.’s bezawlt. Won ich selly $800 g’used het for my intressa zu bezawla, het ich ols noch wenig ivverich kot for on der haupt sum obzumocha. Do kommt widder ainer for gelt!
( Enter Shwinefelt. )
Shwine. Well, Yacub, wee sayts ous hite? Sin widder dry [3] death-notices for dich. Dy 'sessment is $23.75.
Yokle. Ich hob miner sex kens. Won du es net uf holta konsht, don missa mir’s fawra lossa.