‚waß ir hêrren woldet, sît ir ze hove gât.
lât ir mich hœren, wieß iu edelen recken stât.‘
Dô sprach der künic Gunther: ‚vrouwe, ich wilß iu sagen. A.345
wir müeßen michel sorge bî hôhme muote tragen;
wir wellen hübschen rîten verre in vremdiu lant:
wir solden zuo der reise haben zierlîch gewant.‘
‚Nu sitzet, lieber bruoder,‘ sprach daß küneges kint. A.346
‚lât mich rehte hœren, wer die vrouwen sint,
der ir gert ze minne in ander künege lant.‘
die ûßerwelten beide nam diu vrouwe bî der hant.