Uote bat dô drâte die boten vür sich gên. 715
man moht an ir vrâge harte wol verstên,
daß si hôrte gerne: ‚was Kriemhilt noch gesunt?‘
er seite, wier si vunde und daß si kœme in kurzer stunt.
Eß wart von in diu gâbe ze hove niht verdeit, 716
die in gap er Sîvrit: golt und ouch diu kleit
brâhte man ze sehene der drîer künege man.
ir vil grôßer milte wart dâ danken getân.
‚Er mac,‘ sprach dô Hagene, ‚von im sanfte geben: 717
ern kundeß niht verswenden, sold er immer leben.