si giht, mich habe gekebeset Sîvrit ir man.‘
dô sprach der künic Gunther: ‚sô hetes übele getân.‘
‚Si treit hie mînen gürtel, den ich hân verlorn, 797
und mîn golt daß rôte. daß ich ie wart geborn,
daß riuwet mich vil sêre. dun entredest, künic, mich
der vil grôßen schanden, ich minne nie mêre dich.‘
Dô sprach künic Gunther: ‚er sol her vüre gân: 798
hât er sichs gerüemet, daß sol er hœren lân,
oder sîn muoß lougenen der helt ûß Niderlant.‘
dô wart der küene Sîvrit harte balde dar besant.