waß touc, ob ich dem recken wære nu gehaß?
er was ie getriuwe und tet vil willeclîchen daß.‘
Dô sprach ûßer Metzen der degen Ortwîn: 812
‚jane kan in niht gehelfen diu grôße sterke sîn.
erloubet mirß mîn hêrre, ich tuon im alleß leit.‘
dô heten im die helde âne schulde widerseit.
Sîn gevolgte niemen, niuwan daß Hagene 813
riet in allen zîten Gunther dem degene,
ob Sîvrit niht enlebte, sô wurde im undertân
vil der künege lande. der helt des trûren began.