dâ si vil tiere vunden: swaß der von leger stuont,
diu erjeiten die gesellen, sô noch guote jeger tuont.
Swaß ir der bracke ersprancte, diu sluoc mit sîner hant A.877
Sîvrit der küene, der helt von Niderlant.
sîn ros lief sô sêre, daß ir im niht entran.
den lop er vor in allen an dem gejeide gewan.
Er was an allen dingen biderbe genuoc. A.878
sîn tier daß êrste, daß er ze tôde sluoc,
was ein starkeß halpswuol, mit der sîner hant;
dar nâch er vil schiere einen grimmen leuwen vant.