zwiu sold ich den êren, der mir ist gehaß?
daß getuon ich nimmer, die wîl ich hân den lîp:
jane ruoche ich, waß mich nîdet des künic Etzelen wîp.‘
Der übermüete Hagene leit über sîniu bein 1721
ein vil liehteß wâfen, ûß des knophe schein
ein vil liehter jaspis grüener denne ein gras.
wol erkande eß Kriemhilt, daß eß Sîvrides was.
Dô si daß swert erkande, dô gie ir trûrens nôt. 1722
daß gehilz was guldîn, diu scheide ein borte rôt,
eß mande si ir leide: weinen si began;