des nahtes schaffen solden unz an den liehten tac.
ein künec mit sîme gesinde nie sô hêrlîch gelac.
‚Ouwê der nahtselde,‘ sprach Gîselher daß kint, 1765
‚und ouwê mîner vriunde, die mit uns komen sint.
swie eß uns mîn swester sô güetlîch erbôt,
ich vürhte, wir müeßen alle von ir schulden ligen tôt.‘
‚Nu lât iuwer sorgen,‘ sprach Hagene der degen. 1766
‚ich wil der schiltwache noch hînte selbe phlegen.
ich trouwe iuch wol behüeten, unz uns kumet der tac.
des sît gar ân angest: sô genese, swer der mac.‘