der sippe dîner mâge, ê wir den einen man
gæben hie ze gîsel: eß wirt nimmer getân.‘
‚Wir müesen doch ersterben,‘ sprach dô Gîselher. 2043
‚uns enscheidet nieman von rîterlîcher wer.
swer gerne mit uns vehte, wir sîn et aber hie:
wan ich deheinen mînen vriunt an den triuwen nie verlie.‘
Dô sprach der küene Dancwart, im zæme niht ze dagene: 2044
‚jâ enstêt niht eine noch mîn bruoder Hagene.
die hie den vride versprechent, eß mac in werden leit;
des bringe wir iuch inne: daß sî iu wærlîch geseit.‘