si klagten ungevuoge des guoten Rüedegêres lîp.
Âventiure
wie hêrn Dietrîches man alle erslagen wurden.
Dô hôrt man allenthalben jâmer alsô grôß, 2172
daß palas unde türne von dem wuof erdôß.
dô hôrte eß ouch von Berne ein Dietrîches man:
durch disiu starken mære wie balde er gâhen began!
Dô sprach er zuo dem vürsten: ‚hœrt, mîn hêr Dietrîch. 2173
swaß ich noch her gelebet hân, sô rehte unmügelîch
gehôrte ich klage nie mêre, als ich nu hân vernomen.
ich wæne, der künic selbe ist zuo der hôhgezîte komen.