Manndei, denk' i mir, jetzt woaßt aa, wia 's is. I bin aber net von mein Platz weg, weil i g'moant hab', es kunnt no oaner nachkemma.
Es dauert net lang, pfeift der Heiß. I gib eahm staad o, und er pürscht si zuawa.
»Host a Hendl?« fragt er.
»Ja,« sag' i.
»Wo is denn?«
»Da drunt flackt 's,« sag i, und er schaugt abi und siecht den Lumpen. Da pfeift er durch die Zähn' und lacht.
»So,« sagt er, »aba 'r a bissel groß is.«
»Jetzt bleib do, Heiß,« sag i, »i glaab allawei, der is net alloa g'wen. Sei no grad staad!«
I lad' mein Schrotlauf wieder, und der Heiß setzt si neben meiner.