De andern halten, und er deut' aufi, zu dem Platz, wo der g'leg'n is.
Aber so schlau san's do g'wen, daß's net schnurg'rad drauf zua san. Sie verteilen si, und ziag'n si wieder ins Dicket z'ruck, und kemman in an Halbbogen aufa.
»Jetzt,« sag i, »Heiß, schaug Du links umi, i nimm de, wo rechts kemman. Schiaß net z'bald; von de Lumpen hat g'wiß oana 'r an Kugellauf dabei. Mir müassen schaug'n, daß ma zwoa hi'legen. Nacha is d' Rechnung gleichauf.«
Es dauert a halbe Stund. Hie und da hör' i an Astl, aber g'sehg'n hat man nix.
Jetzt san's heroben.
Von oan siech i d' Haxen; er schiabt de Aest auf d' Seiten und halt an Grind außa und horcht. Der Heiß und i, mir rühren uns net. Zum Schiaßen is no z'weit g'wen.
Wia der Lump nix hört, kimmt er ganz außa und geht auf den andern hi, der im Schnee flackt.
I ziag ganz staad auf. Dawei schnallt's beim Heiß und oana schreit.
Jetzt hat's pressiert.
Z'sammschaug'n und schiaßen is bei mir oans g'wen, und den mein' hat's g'rissen.