Der labnsmüde Hos.
Der Leimertschneider war a grußer Gager, oder, genauer gesaht, er tat, als wär er ener. Wenn mer ne sog, – de Flint bal größer wie der ganze Karl, en Hirschfänger wie su e alter Scharfrichtersabel, de Jagdtasch, wu e geringer Ochs drinne Platz gehatt hätt – 's brauchet en net ze wunnern, doß de Hosen un 's ganze Viechzeig draußen in Busch lief, wos när laafen konnt, wenn sich när dar greuliche Karl sahe ließ. Dodrim hott er aa in sen ganzen Labn noch ken Viech ewus tue kenne, un do verlarnt sich doch mit der Zeit 's Traffen.
Die Viecher wurn aa bal gewahr, daß der Leimertschneider net halb esu schlacht war, wie er aussog un ginge ne net mehr esu ausn Wag. Wie er nu noch derzu älter wur un de Agn net mehr esu racht mietwollten, do konnt er über en Hos wagstolpern, er taten nischt.
Zu darer Zeit labet in Richterbusch e alter Hos, dar schie ganz schwach un graa war, dann nischt mehr schmecket, 's mochts Kraut noch esu grü sei, ar hatt kä Vergnign mehr dra. Dar hatts Labn recht soot un in dan Zustand hatt er sich virgenomme: »Pfeif of de Walt, ich loß mich derschießen.« Mit dan Entschluß machet er sich aus'n Richterbusch naus ofn grußen Krautacker, un do traf er en Kollegn von sich, dar sich abn in Kraut e Gitt geta hatt un dar 's Labn net esu efällig fand.
»Nu, wie gieht dersch dä, Gevatter?« esu tat er dan alten Hos areden.
»Na, dank der Nachfrog«, saht dar Alte, »'s könnt besser sei. Ich ho's Labn esu soht, ich bi abn ofn Wag, daß mich ener ibern Haufen schießen soll!«
»Na«, saht dar Gunge, »do hast de Gelick, itzt paßts gerod, do drunten sah ich geleich en Gager komme!« Der Alte drehet sich rim, richtig, unten bein Kuhsteig kam e gruße Flint, wu e Maa drahing. Der alte Hos drehet sich rim, er ließ sich net abbrenge. »Hadje Labn, itze werd gestorbn!« saht er noch, dann wollt er dan Gager entgegengiehe. Of emol blieb er stiehe, un e graaer Schatten ging über sei Gesicht! »Ach du Ugelick«, saht er, »dos is der Leimertschneider, mit'n Erschießen werd do nischt, do muß ich mich schie hänge«. Un er machet sich wieder nei in Richterbusch.