Weihnachten war komme un de viele Arbet der ganzen Zeit vornewag hatt sich doch geluhnt. Mer kannt die alten Stöbeln bal gar net wieder. Alle finstern Ecken warn verschwunden. Do blinket e Barg mit sen Reisighinergrund aus en Winkel raus, dort stand stolz un brätspurig e gruße Peremett of dr Kommod, un von Eckbrattel, wu sinst när e alte Petroleumlamp mit en Perlnscherm ronnergucket, do lacheten e paar Terkenmanneln, als wollten se soong: »Uhne uns gieht 's heilige Christfast gar net!« Wos sonst noch für e Pracht an Lechtern un Spindeln vu de Decken ronerhing, dos is gar net ze beschreibn – korz gesaht: 's ganze Dorf hatt sen schensten Festazug agezung. Un wie dos überall roch! De lange butterstollnluse Zeit war vrbei, 's wur zwar net mehr esu viel un esu schwer gebacken – oder gebacken wur doch. Un daß ja an nischt fahlen sollt, mengeten sich aah noch e paar Rächerkerzeln von Ufen wag in dan Duft mit nei. När äs war annersch bei de mesten: de Feiertogsgans fahlet, dofür log oder schie e fetter Kuhhos' in dr Pfann.
De Kinner liefen mit aufgesperrten Aang drinerüm. 's war doch esu ganz anersch drhem wie sinsten. Un nu noch dar Gedank, wos alles noch komme sollt, – nä, Weihnachten war doch werklich schie!
An heiling Ohmd zon nochmittig kam nu aah überall de Mutter e fünkel zor Ruh. Da un dort gucket aah schie e Bekannts zor Tür rei, dos zon Weihnachtsfast ne Wag wieder emol ehamgefunden hatt. 's wur dischkeriert un Pfeif geraacht un vu dan un gen gestrieten. Un wie üm viere 's Zügle noch emol komme war un de Leut von Bahnhuf kame, drücket sich e Gesicht nochn anern an de Fansterscheibn naa, daß de Fremdenlist net verpaßt wür.
's wur langsam finster draußen, hie un do wur e Fanster hall, ja, e mannichs prubieret de Peremett noch emol un hatt de Lichter agezündt.
Bein Beckendav in dr Stub war aah de ganze Weihnachtsherrlichkät ausgebrät. Oder die Ruh in dr Stub wollt zu den ganzen Fastkram net racht passen. Dr Sager ticket esu hart un knarrig, als wollt'r kä enzige gute Stund mehr azeing. In Ufen knistret manichsmol e Scheitel e fünkel. Ne Dav of dr Ufenbank war de Pfeif lang ausgange, 'r schiens oder gar net ze marken; dann un wann höret mer ne racht schwer Oden huln, als wenn ne e wos racht bedrücket. De Minel knieet of en Stuhl an Fanster un starret naus in dr Dämmering. Abn kame de ersten von Bahnhuf. »Dr Richter-Arnst kimmt aah, scheints mit seiner Fraa. – Dr Höfer-Louis is aah do! – Dort kimmt aah ne Saligbäck seiner; – när uner Paul kimmt net!« Un dobei schluchzet se laut auf un ließ ihrn alten weißen Kopp ofs Fansterbrattel falln. Dr David wischet sich de Aang. Un e ganze Weil soß dr Gammer un 's Harzeläd ellä in dr Stub, sudaß sich dos ganze Weihnachszeig net trauet, sich mausig ze machen. Do stand dr Dav leise auf, hulet sich mit en Holzspan e Flammel ausn Ufen un brannt sen alten Bargmaa sei Lichtel aa. Do kam de Minel von Fanster har; 's alte gute Gesicht war'r ganz verstört un se machet zon Dav hie: »Ach, Dav, loß när alles finster heit! Dos brennt mer in de Aang wie Feier! Ach, du guter Herrgott du, worüm host du bluß men Paul net wieder komme lossen!« Un immer un immer tat se's schütteln vor lauter Nut. Dr Dav bracht aah sei Schnuptüchel net vu de Aang wag, oder 'r nahm sei Minel un führet se ganz sachte an Kanepee hie. Mit dr Hand fuhr 'r sen Minel über'n weißen Scheitel un wischet 'r de Träne vu de Backen wag, un obwuhl 'r salber dacht, 's Harz müßten verzieh, fing'r doch aa leise of'r neizereden. 'r hulet weit aus: wie se erscht de vielen Gahr ellä gewasen wärn, un wie nu endlich doch noch e Sonnenstrahl in ihr Häusel gefalln war, wie dos Gungel kam. »Minel, wie'r dort in sen Körbel log un mer hatten dan Bargmaa zon ersten Mol agezünd; – weßt de noch, wie hoot'r do de klen Aermeln ausgestreckt un egal »Mannel!« geruft!« Oebs de Minel noch wüßt! Vu ihrn nassen Aang fiel e bissel e freundlicher Blick of dan alten Bargmaa hie. »Un wie mern hobn de Peremett gebaut! Dos Gelück! 'r hoot sich bal de Aang ausgeguckt. Jeds Mannel kanntr. Un wie 'r dan Gahr für Gahr allemol wieder e Stück drzugekaaft hatt. Ich sahne heut noch, wie 'r dos Herschel, mit dan Fall drauf, in seine blaagefrurne Händle ehambracht un bei jeden Menschen mußt'r emol Heidee machen.« Doderbei hat'r dos Herschel von Garten waggenomme un sträfet sen Minel leise dermiet an de Backen. Un 'r nahm e Lichtel wag, brannts an Bargmaa aa un tat noch de Peremettenlichter abrenne. Leise fing sich de Peremett ze drehe aa. Un dr Dav machet weter: »Un unre alte Kreuzspinn. Weßt de noch, wie'r of dr Lehr war, un 'r kam emol zon heiling Ohmd ehäm un dar alte Lächter war net aufgemacht? Do sei mer an Nochmittig noch ofn Oeberbuden un hobn ne runnergehult. Minel, wenn 'r heit do wär, 's müßt alles brenne.« Un dobei hatt'r aah dan alten Lächter agezünd. Bei dar Halligkät in dr Stub soog mer nu aah an dr Wand e Bild hänge, wu en Soldat drauf war. Un an Rahme warn Fichtenzweigele naagesteckt. »Ach du guter Paul!« Dos stöhnet de Minel un ging of dos Bild zu. Ich weß net, wenn ich esu e Soldatenbild vu en sah, dar draußen sei gunges Labn hoot lossen müssen, do is mir immer, als könnt mer aus dan Gesichtern en Haufen rauslasen. Als hätten die alle ewos gewußt, wos mir alle net wissen. Der Dav zug sei Minel wieder ofn Kanapee hie un setzet sich drnaben. »Un, mei Minel, war weß wär 'r heit do. Dan hätts net in unnern Dorf gelossen. Dar wär draußen in dr Welt, in dr grußen Stadt. Du schiener Gott, öbs 'n bei dan itzing Zeiten wür gut giehe? Vielleicht hätt'r aah e Fraa, die nett racht zu uns passen tät. Un heit wär 'r bei sen Schwiegerleuten un mir könnten aah bluß an ne denken. War weß, wos'r alles verschläft, dar gute, gute Gung. Esu könne mer uhne en schlachten Gedanken an ne denken! Is net wahr, mei Minel? Un wenn mer ne sollten emol wiedersahe, Minel, ewig werds net dauern, do könne mer när gute Gedanken hobn. 'r war uner Weihnachtslichtel, dar gute Gung in unern Labn, un die brenne net lang!« Un do lehnet de Minel ihrn Kopp an ihrn Dav nan un de Träne vu dan alten Leiten liefen zesamme. Draußen finge de Glocken aa ze läuten un de Minel drücket ihrn Dav noch emol, dann stand se auf un saht leise zu ihrn Maa: »Komm, mer wolln in de Metten giehe!«
