in sîner tarnkappen, dâ er ein schiffel vant.
dar an sô stuont vil tougen daß Sigmundes kint:
er vuorte eß balde dannen, als ob eß wæte der wint.
Den schifmeister niemen sach; daß schiffel sêre vlôß A.452
von Sîvrides kreften: die wâren alsô grôß.
si wânden, daß eß vuorte ein sunder starker wint:
nein, eß vuorte Sîvrit, der schœnen Siglinde kint.
Bî des tages zîte und bî der einen naht A.453
kom er zeime lande mit michelre maht,
hundert langer raste und dannoch lîhte baß;